2006 جىلى 11 اقپاندا ساياساتكەر التىنبەك سارسەنبايۇلىن ۇستاۋ كەزىندە ەشقانداي كۇش قولدانبادىق. بۇل تۋرالى ۇقك-گە قاراستى «ارىستان» ارنايى جاساعىنىڭ كومانديرى ەدىل ابىكەنوۆ ازاتتىققا بەرگەن سۇحباتىندا ايتتى دەپ جازادى Dalanews.kz Arasha پورتالىنا سىلتەپ. 

ەدىل ابىكەنوۆ وسى وقيعادان كەيىن 5 ارىپتەسىمەن بىرگە سوتتالعان، ءوزى تۇرمەدە 12 جىل وتىرىپ شىقتى.

«التىنبەك سارسەنباي ۇلى كەلە جاتقان كولىكتى توقتاتتىق، ءوزى شىقتى. ونىڭ بارلىعى نۇسقاۋلىق بويىنشا ورىندالدى. ءبىز ەشقانداي كۇش قولدانبادىق. ونى كەزدەسۋگە الىپ باردىق. ودان ارى نە بولعانىن ءبارى بىلەدى. ءبىز «تەمنايا لوشادكا» بولدىق قوي. تازا پوستاۆاعا تۇستىك. ءبىز توقتاتقاندا التىنبەك «ءبىزدىڭ كەزدەسۋىمىز كەلەسى كۇنى بولۋ كەرەك ەدى عوي» دەپ ايتقانى ەسىمدە. ول كىممەن كەزدەسكەلى جۇرگەنىن مەن بىلمەدىم. ونىڭ كىممەن كەزدەسكەنىن كەيىن بىلدىك. ءبىز ونى قولدان قولعا بەردىك، تىپتەن ونى ولتىرەتىنىن دە بىلمەدىك. ەگەر ولاي بولاتىنىن بىلگەندە سول جەردە اياعىنا دەيىن قالار ەدىم. ءبىزدى قايتارىپ جىبەردى. ەگەر ءبىز قايتپاعاندا ونداي جاعداي بولماس ەدى»، – دەدى ابىكەنوۆ.

سونداي-اق ول التىنبەك سارسەباي ۇلىنىڭ ىسىنە قاتىستى ايتىلماعان دۇنيەلەر ءالى دە كوپ ەكەنىن جانە جاقىن ۋاقىتتا ول اشىق جاريا بولمايتىنىن جەتكىزدى.

«مەن ءوز كىنامدى مويىندايمىن. كوماندير رەتىندە بۇل جايتتىڭ وسىنداي تراگەدياعا الىپ كەلۋىنە جول بەردىم. مەن قۇجاتتى تەكسەرمەدىم، بۇيرىقتىڭ راستىعىن تۇسىنبەدىم. ءبىز «پەشكامىز» عوي، قانداي ۇكىم شىعاراتىنىن جوعارىداعىلار شەشتى. ءبىز باستىسى اتىپ تاستاماسا دەپ ۋايىمدادىق. شىنىمدى ايتسام التىنبەك سارسەنباي ۇلىنىڭ جوعارى شەندى ادام ەكەنىن بىلگەن جوقپىن. ونى سوت بارىسىندا تانىدىم. «ارىستاننىڭ» جىگىتتەرى ءوزىمىزدىڭ كومانديرلەرىمىزدى تانيمىز، ساياساتكەرلەردى تانىمايتىنبىز. كىمنىڭ-كىم ەكەنىن بىلمەدىك. ءۇش ادامنىڭ ءولىمى وڭاي ەمەس، ءوزىم لايىقتى جازامدى الدىم. ونىڭ ءۇش ادامدى ءداتى بارىپ قالاي اتقانى ميىما سىيمايدى. ارنايى جاساقتا ىستەگەن بىزدە ونداي بولمادى، قولىن بايلاپ، اتىپ تاستاۋ دەگەن ايۋاندىق قوي»، – دەدى ول.

سونداي-اق ول ساياساتكەردى ۇستاۋ جونىندە بۇيرىقتى بۇرىنعى پوليسيا قىزمەتكەرى رۋستام يبراگيموۆ بەرگەنىن ايتتى.

«ول ءبارى جوعارى جاقتا شەشىلىپ قويدى. تەك ءبىر كوممەرسانتتى ۇستاپ اكەلسەڭدەر بولدى»، دەپ ايتتى. يبراگيموۆپەن تويدا تانىسقانمىن. ونىڭ جوعارى جاقتا بايلانىسى كۇشتى بولدى، -دەيدى ابىكەنوۆ.

ەدىل ابىكەنوۆ سارسەنبايۇلىن جەتكىزۋدە سونىڭ كولىگىندە وتىرىپ بارعانىن ايتتى. جولدا ساياساتكەر سۋ الىپ بەرۋىن وتىنگەن. دوستىق-كالەنينا قيىلىنىدا (قابانبايدا) دۇڭگىرشەككە توقتاپ، سول جەردە دالاعا شىعىپ سۋ ىشكەندەرىن جەتكىزدى.

«ءبىز ايتقان جەرگە كەلگەندە ەكى دجيپ كولىگى تۇردى. ولار بىزگە بازاعا قايتا بەرىڭدەر دەدى. كەيىن بىلدىك ول ميروشنيكوۆ بولىپتى. ءبىز ساياساتكەردىڭ جانە كومەكشىلەرىنىڭ تەلەفونىن الىپ، بارداشەككە سالىپ قويعانبىز. كەيىن ءبىزدى ادام ۇرلادى، تونادى دەپ باستى كىنالى ەتىپ شىعاردى»، – دەيدى ول.