2006 jyly 11 aqpanda saiasatker Altynbek Sársenbaiulyn ustaý kezinde eshqandai kúsh qoldanbadyq. Bul týraly UQK-ge qarasty «Arystan» arnaiy jasaǵynyń komandiri Edil Ábikenov Azattyqqa bergen suhbatynda aitty dep jazady Dalanews.kz Arasha portalyna siltep.
Edil Ábikenov osy oqiǵadan keiin 5 áriptesimen birge sottalǵan, ózi túrmede 12 jyl otyryp shyqty.
«Altynbek Sársenbaiuly kele jatqan kólikti toqtattyq, ózi shyqty. Onyń barlyǵy nusqaýlyq boiynsha oryndaldy. Biz eshqandai kúsh qoldanbadyq. Ony kezdesýge alyp bardyq. Odan ary ne bolǵanyn bári biledi. Biz «temnaia loshadka» boldyq qoi. Taza postavaǵa tústik. Biz toqtatqanda Altynbek «bizdiń kezdesýimiz kelesi kúni bolý kerek edi ǵoi» dep aitqany esimde. Ol kimmen kezdeskeli júrgenin men bilmedim. Onyń kimmen kezdeskenin keiin bildik. Biz ony qoldan qolǵa berdik, tipten ony óltiretinin de bilmedik. Eger olai bolatynyn bilgende sol jerde aiaǵyna deiin qalar edim. Bizdi qaitaryp jiberdi. Eger biz qaitpaǵanda ondai jaǵdai bolmas edi», – dedi Ábikenov.
Sondai-aq ol Altynbek Sársebaiulynyń isine qatysty aitylmaǵan dúnieler áli de kóp ekenin jáne jaqyn ýaqytta ol ashyq jariia bolmaitynyn jetkizdi.
«Men óz kinámdi moiyndaimyn. Komandir retinde bul jaittyń osyndai tragediiaǵa alyp kelýine jol berdim. Men qujatty teksermedim, buiryqtyń rastyǵyn túsinbedim. Biz «peshkamyz» ǵoi, qandai úkim shyǵaratynyn joǵarydaǵylar sheshti. Biz bastysy atyp tastamasa dep ýaiymdadyq. Shynymdy aitsam Altynbek Sársenbaiulynyń joǵary shendi adam ekenin bilgen joqpyn. Ony sot barysynda tanydym. «Arystannyń» jigitteri ózimizdiń komandirlerimizdi tanimyz, saiasatkerlerdi tanymaitynbyz. Kimniń-kim ekenin bilmedik. Úsh adamnyń ólimi ońai emes, ózim laiyqty jazamdy aldym. Onyń úsh adamdy dáti baryp qalai atqany miyma syimaidy. Arnaiy jasaqta istegen bizde ondai bolmady, qolyn bailap, atyp tastaý degen aiýandyq qoi», – dedi ol.
Sondai-aq ol saiasatkerdi ustaý jóninde buiryqty burynǵy politsiia qyzmetkeri Rýstam Ibragimov bergenin aitty.
«Ol bári joǵary jaqta sheshilip qoidy. Tek bir kommersantty ustap ákelseńder boldy», dep aitty. Ibragimovpen toida tanysqanmyn. Onyń joǵary jaqta bailanysy kúshti boldy, -deidi Ábikenov.
Edil Ábikenov Sársenbaiulyn jetkizýde sonyń kóliginde otyryp barǵanyn aitty. Jolda saiasatker sý alyp berýin ótingen. Dostyq-Kalenina qiylynyda (Qabanbaida) dúńgirshekke toqtap, sol jerde dalaǵa shyǵyp sý ishkenderin jetkizdi.
«Biz aitqan jerge kelgende eki djip kóligi turdy. Olar bizge bazaǵa qaita berińder dedi. Keiin bildik ol Miroshnikov bolypty. Biz saiasatkerdiń jáne kómekshileriniń telefonyn alyp, bardashekke salyp qoiǵanbyz. Keiin bizdi adam urlady, tonady dep basty kináli etip shyǵardy», – deidi ol.
