Qaraǵandy oblysynda mefedron óndirýmen ainalysqan iri esirtki zerthanasynyń qyzmeti toqtatyldy, dep habarlaidy Dalanews.kz.
Politsiia qyzmetkerleri zerthanaǵa qatysty jedel-izdestirý is-sharalaryn júrgizip, transulttyq qylmystyq toptyń eki múshesin ustady.
Operatsiiany Qaraǵandy oblysy politsiia departamentiniń esirtki qylmysyna qarsy is-qimyl basqarmasynyń qyzmetkerleri oblystyq UQK departamenti jáne prokýratýramen birlesip júrgizdi.
Jedel ázirleme transulttyq qylmystyq topqa qatysty júzege asyrylǵan. Tergeý nusqasyna sáikes, top músheleri Qazaqstan jáne kórshiles memleketter aýmaǵynda asa iri kólemde esirtki quraldary men psihotroptyq zattardy daiyndap, keiinnen zańsyz ótkizýdi kózdegen.
Jedel-izdestirý jáne tergeý is-sharalarynyń nátijesinde 48 jáne 28 jastaǵy eki kúdikti ustaldy. Tergeý málimetterine sáikes, 48 jastaǵy kúdikti qylmystyq toptyń uiymdastyrýshylyq máselelerine jaýap bergen. Ol jańa qatysýshylardy tartyp, olardyń ózara bailanysyn qamtamasyz etip otyrǵan. Al 28 jastaǵy kúdikti zerthananyń jumysyn tikelei uiymdastyryp, jańa qatysýshylardy esirtki quraldary men psihotroptyq zattardy daiyndaý tásilderine úiretken.
Zerthana aýmaǵynda júrgizilgen tintý barysynda kólemi 50 tonna bolatyn ónerkásiptik tsisterna anyqtaldy. Onyń ishinde shamamen 16 tonna paidalanylǵan ónim men suiyqtyq bolǵan.
Sonymen qatar kólemi bir tonnadan bolatyn eki ydys, 20 litrlik úsh kanistr jáne untaq tárizdi zattardyń qaldyqtary bar 10 polimer qap tárkilendi. Ydystardyń ishinen ótkir himiialyq iisi bar zattardyń qaldyqtary tabylǵan.
"Ónerkásiptik tsisternadan zertteý úshin 10 litr synama alyndy. Mamandardyń qorytyndysyna sáikes, usynylǵan úlgiden mefedron anyqtaldy. Zerttelgen synamadaǵy esirtki zatynyń salmaǵy 1 keli 723 gramdy qurady", – dedi Qaraǵandy oblysy politsiia departamentiniń bastyǵy Negmet Ismagýlov.
Mamandardyń aldyn ala esepteýine sáikes, anyqtalǵan zattyń kólemi men zertteý nátijelerin eskere otyryp, daiyn mefedronnyń yqtimal kólemi 2 tonnaǵa deiin jetýi múmkin.
Bul shamamen 2 million bir rettik doza. Iaǵni atalǵan kólem esirtkiniń zańsyz ainalymyna túsken jaǵdaida, milliondaǵan adamǵa qaýip tóndirýi yqtimal edi. Onyń zańsyz naryqtaǵy aldyn ala quny 40 milliard teńgege deiin baǵalanyp otyr. –
"Osylaisha, quqyq qorǵaý organdary asa iri kólemdegi esirtki partiiasy zańsyz ainalymǵa túspei turyp, aýqymdy esirtki óndirisiniń jolyn kesti", – dep atap ótti Negmet Ismagýlov.
Eki kúdiktige de qamaýda ustaý túrindegi bultartpaý sharasy qoldanyldy.
Qazirgi ýaqytta sotqa deiingi tergep-tekserý jalǵasýda. Qylmystyq árekettiń barlyq mán-jaiy, shikizattyń jetkizilý arnalary, kúdiktilerdiń yqtimal bailanystary jáne transulttyq qylmystyq toptyń ózge de qatysýshylary anyqtalýda.
Esirtki zerthanalaryn anyqtaý jáne olardyń qyzmetin toqtatý, sondai-aq esirtkiniń zańsyz ainalym arnalarynyń jolyn kesý boiynsha jumystar “Zań men tártip” qaǵidaty aiasynda jalǵasýda.
