بۇگىن وبلىس بويىنشا 21 مىڭنان اسا ادام «تازا قازاقستان» جالپىۇلتتىق باعدارلاماسى اياسىنداعى رەسپۋبليكالىق اعاش وتىرعىزۋ اكسياسىنا بەلسەندى قاتىستى، دەپ حابارلايدى Dalanews.kz
اقتوبە قالاسىنداعى «ترياتلون» ساياباعىندا ۇيىمداستىرىلعان اۋقىمدى ءىس-شارا 800-دەن استام ادامنىڭ باسىن بىرىكتىردى. ولاردىڭ ىشىندە ەڭبەك ارداگەرلەرلەرى، وبلىستىق جانە قالالىق ءماسليحات دەپۋتاتتارى، وبلىستىق جانە قالالىق قوعامدىق كەڭەس مۇشەلەرى، مەملەكەتتىك ورگانداردىڭ قىزمەتشىلەرى، جاستار جانە «جاسىل ەل» ەڭبەك جاساعى، ءتىپتى وزدەرى بەلسەندىلىك تانىتىپ كەلگەن قالا تۇرعىندارى دا بولدى.
تابيعي رەسۋرستار جانە تابيعاتتى پايدالانۋدى رەتتەۋ باسقارماسىنىڭ دەرەگىنە سۇيەنسەك، وڭىردە 10 مىڭداي كوشەت وتىرعىزىلسا، سونىڭ 500-گە جۋىق «ترياتلون» اۋماعىنا ەگىلدى. ونىڭ ىشىندە جەمىس اعاشتارى اققايىڭ، شىرشا، شەتەن جانە تاعى دا باسقا اعاش تۇرلەرى بار.
اكسياعا وبلىس اكىمى اسحات شاحاروۆ تا قاتىسىپ، شىرشا اعاشىن وتىرعىزدى. ايماق باسشىسى مۇنداي باستامالار ءوڭىردىڭ ەكولوگيالىق احۋالىن جاقسارتۋمەن قاتار، قوعامدا تازالىق پەن جاۋاپكەرشىلىك مادەنيەتىن قالىپتاستىرۋعا ىقپال ەتەتىنىن العا تارتتى.
بۇدان بولەك، «تازا قازاقستان» باعدارلاماسى اياسىندا اقتوبە وڭىرىندە ەكىايلىق سەنبىلىك وتكىزىلۋدە. بۇگىن اقتوبەلىكتەر 1100 گەكتار اۋماقتا تازالىق جۇمىستارىن جۇرگىزدى.
