شىمكەنتتىك اۆتوبلوگەر ءارى زاڭگەر رۋسلان جانپەيىسوۆ 4 تاۋلىككە قاماۋعا الىندى، دەپ حابارلايدى Dalanews.kz "OTYRAR"-عا سىلتەمە جاساپ.
ول پوليسيا قىزمەتكەرىنىڭ «وكىمىنە نەمەسە زاڭدى تالابىنا باعىنباعانى» (اكىمشىلىك كودەكستىڭ 667-بابىنىڭ 1-بولىگى) بويىنشا كىنالى دەپ تانىلدى. قالالىق اكىمشىلىك سوت ونى 4 تاۋلىككە قاماۋعا الدى. جازا مەرزىمى 22 ساۋىردەن باستاپ ەسەپتەلەدى.
22 ءساۋىر كۇنى رۋسلان جانپەيىسوۆ اتىمەن تانىلعان بەيبارىس رايىمبەكوۆتى پوليسەيلەر جۇمىس ورنىنان ۇستاعان. تەرگەۋ يزولياتورىنا جەتكىزىلگەننەن كەيىن وعان قاتىستى قاماۋ تۋرالى حاتتاما تولتىرىلعان. سول كەزدە جانپەيىسوۆكە ءدال وسى باپ بويىنشا ايىپ تاعىلىپ، بايدىبەك بي داڭعىلى بويىندا رەيد جۇرگىزىپ جاتقان قىزىلوردالىق پوليسيا قىزمەتكەرلەرىنىڭ «زاڭدى تالاپتارىنا باعىنبادى، ولاردىڭ جۇمىسىنا كەدەرگى كەلتىردى، قۇرمەتسىزدىك تانىتتى» دەگەن ايىپتار تاعىلعان ەدى. الايدا كەشە سوت ونىڭ ارەكەتتەرىندە قۇقىقبۇزۋشىلىق جوق دەپ تانىپ، ءىستى قىسقارتقان.
ال بۇگىنگى ءىس بويىنشا جانپەيىسوۆتىڭ تاۋكە حان كوشەسى بويىندا رەيد جۇرگىزىپ جاتقان قاراعاندىلىق پوليسيا قىزمەتكەرلەرىنە جاقىنداپ، ولاردىڭ ىس-ارەكەتتەرىن ۆيدەوعا تۇسىرگەن ساتتەرى قارالعان. بۇل ۆيدەولار ءىس ماتەريالدارىنا دالەل رەتىندە تىركەلگەن.
