شىمكەنت قالاسىنىڭ قىلمىستىق ىستەر جونىندەگى اۋدانارالىق سوتىندا بلوگەرگە قاتىستى قىلمىستىق ءىس قارالدى. سوت ونى ءىرى مولشەردە مۇلىك الۋ ماقساتىندا قورقىتىپ الۋشىلىق جاساعانى ءۇشىن كىنالى دەپ تانىدى، دەپ حابارلايدى Dalanews.kz
سوت ماتەريالدارىنا سايكەس، سوتتالۋشى 2025 جىلدىڭ قازان ايىندا الەۋمەتتىك جەلىدە شىمكەنت قالاسى اكىمدىگىءنىڭ بەدەلىنە نۇقسان كەلتىرەتىن جازبا جاريالاعان. كەيىن اكىمدىك وكىلىمەن كەزدەسۋدە 10 ملن تەڭگەگە اقپاراتتىق مەملەكەتتىك تاپسىرىس شارتى جاسالۋىن تالاپ ەتكەن.
ەگەر بۇل تالاپ ورىندالماسا، ول اكىمدىكتى ماسقارالايتىن جازبالاردى ءوز پاراقشاسىندا جاريالايتىنىن ايتىپ قورقىتقان.
2025 جىلعى 6 قاراشادا سوتتالۋشى 990 مىڭ تەڭگەنى اناسىنىڭ بانكتىك ەسەپشوتىنا اۋدارتۋ ارقىلى العان.
سوت وتىرىسىندا ايىپتالۋشى كىناسىن ءىشىنارا مويىنداپ، ءوزىن باس بوستاندىعىنان ايىرماۋدى سۇرادى.
سوت ونىڭ شىن وكىنۋىن، اسىراۋىندا بەس كامەلەتكە تولماعان بالاسىنىڭ بولۋىن جانە كەلتىرىلگەن زالالدىڭ وتەلۋىن جەڭىلدەتەتىن ءمان-جاي رەتىندە ەسكەردى. اۋىرلاتاتىن جاعدايلار انىقتالماعان.
سوت ۇكىمىمەن بلوگەر قازاقستان رەسپۋبليكاسى قىلمىستىق كودەكسىنىڭ 194-بابى 3-بولىگى 2-تارماعى بويىنشا كىنالى دەپ تانىلىپ، 5 جىلعا باس بوستاندىعىنان ايىرىلدى. سونداي-اق وسى مەرزىمگە بۇقارالىق اقپارات قۇرالدارى سالاسىندا قىزمەتپەن اينالىسۋ قۇقىعىنان ايىرىلدى.
ۇكىم زاڭدى كۇشىنە ەنگەن جوق.
