قازىرگى تاڭدا ءدىني ەكسترەميزم مەن راديكالدى يدەولوگيانىڭ الدىن الۋ جۇمىستارى جۇيەلى تۇردە جۇرگىزىلىپ كەلەدى. مەملەكەت بۇل باعىتتا كەشەندى شارالار قابىلداپ، دەسترۋكتيۆتى اعىمدارعا توسقاۋىل قويۋعا باسىمدىق بەرىپ وتىر. بۇل تۋرالى شىمكەنت قالاسى ءدىن ىستەرى باسقارماسىنىڭ باسشىسى باحتيار ونەربايەۆ ايتىپ بەردى، دەپ حابارلايدى Dalanews.kz
«ءبىزدىڭ باستى ماقساتىمىز – دەسترۋكتيۆتى ءدىني اعىم وكىلدەرىن ءداستۇرلى دىنگە، قوعامدىق قۇندىلىقتارعا بەيىمدەۋ جانە ولارمەن اقپاراتتىق ءتۇسىندىرۋ جۇمىستارىن ۇزدىكسىز جۇرگىزۋ»، – دەيدى باسقارما باسشىسى.
باحتيار ونەربايەۆتىڭ ايتۋىنشا، تەرروريزم مەن ەكسترەميزمگە قارسى كۇرەس قازاقستان زاڭناماسىندا ناقتى بەلگىلەنگەن. قىلمىستىق كودەكستىڭ 256–259 باپتارىندا راديكالدى يدەولوگيانى تاراتۋ، ءدىني جانە ۇلتارالىق ارازدىق تۋدىرۋ سەكىلدى ارەكەتتەرگە جاۋاپكەرشىلىك قاراستىرىلعان.
«شىمكەنت قالاسىندا وسى باپتار بويىنشا سوتتالعان 70-كە جۋىق ازامات ءقازىر تۇزەتۋ مەكەمەلەرىندە وتىر. بۇل – قوعامدا دەسترۋكتيۆتى يدەيالارعا جول جوق دەگەننىڭ ناقتى دالەلى»، – دەيدى ول.
قازىرگى ۋاقىتتا ينتەرنەت – راديكالدى يدەولوگيانىڭ نەگىزگى تارالۋ ارناسىنا اينالعان. وسىعان بايلانىستى ارنايى مونيتورينگ جۇيەلەرى مەن كيبەرباقىلاۋ قۇرالدارى ىسكە قوسىلعان.
ساراپشىنىڭ ايتۋىنشا، جاستار ينتەرنەتتەگى ءار اقپاراتقا سەنە بەرمەۋى كەرەك. سەبەبى الەۋمەتتىك جەلىلەردە فەيك جانە ارانداتۋشىلىق مازمۇنداعى ماتەريالدار ءجيى تارالادى.
قازاقستاندا بۇگىنگى تاڭدا 18 كونفەسسيا رەسمي تىركەلگەن. مەملەكەت بارلىق دىنگە تەڭ مۇمكىندىك بەرەدى، ءبىراق ولاردىڭ قىزمەتى زاڭ اياسىندا قاداعالانادى.
شىمكەنت قالاسىندا 9 ميسسيونەر تىركەلگەن، بارلىعى جىل سايىن قايتا تىركەۋدەن وتەدى. سونداي-اق قالادا 32 ءدىني بىرلەستىك بار. ولارمەن مەملەكەتتىك ورگاندار بىرلەسىپ ءتۇرلى الەۋمەتتىك جانە تاربيەلىك جوبالاردى جۇزەگە اسىرادى.
«ءبىز ءدىني بىرلەستىكتەردى مەملەكەتتىك مەرەكەلەرگە، ەكولوگيالىق اكسيالارعا شاقىرامىز. ماقسات – ءدىندى قوعاممەن ۇندەستىرۋ، ورتاق قۇندىلىقتاردى دارىپتەۋ»، – دەيدى باسقارما باسشىسى.
باسقارما جىل سايىن كوللەدجدەر مەن ۋنيۆەرسيتەتتەرگە تەولوگ جانە پسيحولوگ مامانداردى جىبەرىپ، ءدىن، ءداستۇر جانە راديكاليزمنىڭ ءقاۋپى تۋرالى دارىستەر وتكىزەدى. بۇل – جاستاردىڭ ءدىني ساۋاتتىلىعىن ارتتىرۋداعى ماڭىزدى باعىتتاردىڭ ءبىرى.
ساراپشىنىڭ ايتۋىنشا، ءداستۇرلى ءدىن مەن ۇلتتىق قۇندىلىقتار – قوعامدى بىرىكتىرەتىن باستى نەگىز. اداسقان اعىمداردىڭ ەڭ ءقاۋىپتى تۇسى – ولاردىڭ ادامدى وتباسىنان، اتا-اناسىنان جانە ۇلتتىق سانا مەن داستۇردەن الىستاتۋى.
«ءبىزدىڭ ءداستۇرلى ءدىنىمىز – اتا-اناسىنا قارسى شىقپاعان، ءسالت-داستۇرىن ساقتاعان، قوعاممەن بىرگە بولعان ءدىن. ال دەسترۋكتيۆتى اعىمدار، كەرىسىنشە، ادامدى بولەكتەيدى. سوندىقتان ءبىز جاستارعا ءوز تاريحىن، جەتى اتاسىن، مادەنيەتىن بىلۋگە شاقىرامىز»، – دەيدى ول.
ءدىن ىستەرى باسقارماسى باسشىسىنىڭ پىكىرىنشە، قوعامنىڭ قاۋىپسىزدىگى – ءار ازاماتتىڭ ءدىني جانە قۇقىقتىق ساۋاتتىلىعىنا تىكەلەي بايلانىستى. ەگەر اركىم زاڭدى، ءداستۇردى جانە ورتاق قۇندىلىقتاردى سىيلاسا، راديكالدى يدەولوگياعا جول جابىلادى.
«ءبىز زايىرلى مەملەكەتپىز. ءبىز زاڭ مەن پاراسات ۇستەمدىك ەتكەن ەل بولۋىمىز كەرەك. سوندا عانا ۇرەي مەن قورقىنىش جوق ءقاۋىپسىز قوعام قۇرامىز»، – دەدى باحتيار ونەربايەۆ ءالتاي ۇلى.
