قازاقستاندىق كاسىپكەر يسلامعالي قوزباقوۆ "قايسار" فۋتبول كلۋبىنىڭ جاڭا يەسى اتاندى، دەپ حابارلايدى Dalanews.kz.
30 قازاندا پرەزيدەنتتىڭ قىزىلوردا وبلىسىنا ساپارى جوسپارلانعان. ساپار قارساڭىندا وبلىس اكىمدىگىندە "قايساردى" جەكە مەنشىككە وتكىزۋ ماسەلەسى بويىنشا جيىن ءوتتى.
"بارلىق قاجەتتى قۇجاتتار راسىمدەلىپ، كلۋبتىڭ جاڭا يەسى رەتىندە يسلامعالي قوزباقوۆ بەكىتىلدى. ەرتەڭ جەرگىلىكتى بيلىك پرەزيدەنتكە تاپسىرمانىڭ ءساتتى ءارى جەدەل ورىندالعانىن حابارلايدى"، - دەلىنگەن Telegram-ارنادا جاريالانعان اقپاراتتا.
ماۋسىم ناتيجەسى جانە جاڭا يەنىڭ كىم ەكەنى
بيىلعى ماۋسىم قورىتىندىسى بويىنشا قىزىلوردانىڭ "قايسارى" 22 ۇپاي جيناپ، قازاقستان پرەمەر-ليگاسىنىڭ تۋرنير كەستەسىندە 11-ورىن الدى.
يسلامعالي قوزباقوۆ - قىزىلوردالىق كاسىپكەر، TAU Group Ltd قۇرىلىس كومپانياسىن باسقارادى. اشىق دەرەككوزدەردە ونىڭ كاپيتالى تۋرالى مالىمەت جوق.
