قما شىعىس قازاقستان وبلىسى بويىنشا دەپارتامەنتى زاڭسىز كاسىپكەرلىك قىزمەت فاكتىسى بويىنشا تەرگەپ-تەكسەرۋدى اياقتادى، دەپ حابارلايدى Dalanews.kz.
شىعىس قازاقستان وبلىسى شەمونايحا اۋدانىندا ورنالاسقان «گلينكوۆسكوە» كەن ورنىندا ج ش س باسشىسى پايدالى قاتتى قازبالاردى زاڭسىز ءوندىرۋ مەن وتكىزۋدى ۇيىمداستىرعان.
كومپانيانىڭ ليسەنزياسى تەك گەولوگيالىق بارلاۋ جۇمىستارىن جۇرگىزۋگە عانا قۇقىق بەرگەن.
الايدا پايدالى قازبالاردى ونەركاسىپتىك كولەمدە وندىرۋگە رۇقسات بولماعان.
سوعان قاراماستان، ءىس جۇزىندە تەمىر قۇرامدى تاۋ جىنىسىن ءوندىرۋ، ونى قايتا وڭدەۋ، جيناقتاۋ جانە ىشكى نارىقتا، سونداي-اق جۇڭگو حالىق رەسپۋبليكاسىنا وتكىزۋ جۇمىستارى جۇرگىزىلگەن.
اۋىر ارنايى تەحنيكانى قولدانۋ قورشاعان ورتاعا تەرىس اسەر ەتىپ، جەر بەدەرىنىڭ تابيعي قالپىنىڭ بۇزىلۋىنا جانە جەردىڭ توزۋىنا اكەپ سوققان.
زاڭسىز وندىرىلگەن ءونىمنىڭ جالپى كولەمى 70 مىڭ توننادان اسقان.
الىنعان قىلمىستىق تابىس سوماسى 1 ملرد تەڭگەدەن اسقان.
اتالعان قاراجاتقا كۇدىكتىلەر جىلجىمالى جانە جىلجىمايتىن مۇلىك: بيزنەس-ورتالىق، الماتى قالاسىنداعى پاتەر، «LAND ROVER RANGE ROVER» ماركالى اۆتوكولىك، 2 اۆتوتۇراق ورنى جانە 2 جەر تەلىم ساتىپ العان.
سوت سانكسياسىمەن اتالعان مۇلىككە تىيىم سالىندى.
ايتا كەتەيىك، بۇعان دەيىن دەپارتامەنت شىعىس قازاقستان وبلىسىنىڭ ۇلان اۋدانى اۋماعىنداعى «شىبىندى» جانە سامار اۋدانىنىڭ «كەنكارىن» ۋچاسكەلەرىندە اۋىر ارنايى تەحنيكا مەن ونەركاسىپتىك جابدىقتاردى پايدالانا وتىرىپ، التىندى زاڭسىز وندىرۋمەن اينالىسقان ەكى قىلمىستىق توپتىڭ قىزمەتىن توقتاتقان.
اتالعان زاڭسىز ارەكەتتەر ورمان القاپتارىنىڭ كەسىلۋىنە، وزەن ارنالارىنىڭ وزگەرۋىنە جانە توپىراقتىڭ قۇنارلى قاباتىنىڭ جويىلۋىنا اكەلىپ، ەكولوگياعا ەلەۋلى زيان كەلتىرگەن.
زاڭسىز كەن ءوندىرۋدى توقتاتۋ تابيعي ورتانىڭ ودان ءارى ءبۇلىنۋىنىڭ الدىن الىپ، ءوڭىردىڭ ەكولوگيالىق قاۋىپسىزدىگىنە تونگەن قاتەردى جويۋعا مۇمكىندىك بەردى.
