27 جاستاعى كريستينا گاۆريليۋك اقشا ءۇشىن باسقا وتباسىنىڭ بالاسىن كوتەرۋگە كەلىسىم بەرگەن. ونىڭ ايتۋىنشا، جۇڭگو ازاماتتارى بولىپ تابىلاتىن ەرلى-زايىپتى جۇپپەن كەلىسىمشارت جاسالعان. ەمبريوندى الماتىداعى كلينيكالاردىڭ بىرىندە سالعان.
جۇكتىلىك كەزىندە تاپسىرىس بەرۋشىلەر وعان تۇراقتى تۇردە اقشا اۋدارىپ وتىرعان. اي سايىن شامامەن 200 مىڭ تەڭگە تولەپ تۇرعان.
الايدا جۇكتىلىك اسقىنۋىنا بايلانىستى كريستينا جەتىنشى ايدا بوسانىپ، شالا تۋعان ۇل دۇنيەگە كەلگەن. ايەلدىڭ سوزىنشە، وسىدان كەيىن بيولوگيالىق اتا-انالار بالانى الۋدان باس تارتقان.
كريستينانىڭ ايتۋىنشا، كەسار تىلىگىنەن كەيىن نارەستەنى بىردەن بولىمشەگە الىپ كەتكەن.
«بىرنەشە ساعاتتان كەيىن مەدبيكە كەلىپ، بالانىڭ جاعدايى جاقسى ەكەنىن ايتتى. كەيىن بيولوگيالىق اتا-انالار الدىمەن بالانىڭ دەنساۋلىعىن تەكسەرۋ ءۇشىن اناليز تاپسىرۋدى تالاپ ەتتى. تالداۋ ناتيجەلەرى جاقسى شىقتى. كەيىن ولار دنق ساراپتاماسىن جاساتۋدى سۇرادى. ساراپتاما بالانىڭ سولاردىڭ پەرزەنتى ەكەنىن راستادى. سودان كەيىن ءبىراز ۋاقىت كۋراتور ارقىلى سويلەسىپ تۇردىم. كەيىن بيولوگيالىق انا جاۋاپ بەرمەي، بالانى الىپ كەتۋدى سۇرادى»، – دەيدى ول.
كريستينا دۇكەندە ساتۋشى بولىپ جۇمىس ىستەيدى جانە التى جاستاعى قىز تاربيەلەپ وتىر. بۇعان دەيىن ول ەكى رەت سۋرروگات انا بولعان جانە ول جاعدايلاردىڭ ءبارى ءساتتى اياقتالعان.
ال بۇل جولى ايەل ۋادە ەتىلگەن سىياقىسىن الا الماي قالعانىن ايتادى. ول شىن مانىندە باسقا ادامنىڭ بالاسىن تاربيەلەۋگە دايىن ەمەس ەكەنىن اشىق مالىمدەدى.
«مەن تەك ايايمىن. ويتكەنى وسىلاي بولىپ قالدى. دارىگەرلەر كەيىن ول تاستاندى بالا بولۋى مۇمكىن ەكەنىن ايتتى. كەيىننەن ونىڭ اتا-اناسى باس تارتقانى تۋرالى جازىلدى. سول ساتتە مەن ءوزىمدى عانا ويلادىم – ولار مەنى الداپ كەتتى. بالا ماعان كەرەك ەمەس. ويتكەنى ول مەنىڭ بالام ەمەس»، – دەيدى كريستينا.
بوسانعاننان كەيىن ايەل جاڭا تۋعان سابيدەن رەسمي تۇردە باس تارتقان. ءقازىر نارەستە سابيلەر ۇيىندە.
بيولوگيالىق اتا-انالار تۋرالى ناقتى اقپارات از. ولاردىڭ جۇڭگو ازاماتتارى ەكەنى عانا بەلگىلى. ءقازىر قايدا جۇرگەنى بەلگىسىز. ەمبريون سالۋ پروسەدۋراسى جاسالعان كلينيكا بۇل جاعدايعا قاتىستى پىكىر بەرۋدەن باس تارتقان.
كريستينا پوليسياعا ارىز جازعانىمەن، الماتى قالالىق پوليسيا دەپارتامەنتى قىلمىستىق ءىس قوزعاۋدان باس تارتقان.
پوليسيا وكىلدەرىنىڭ ايتۋىنشا، تەكسەرىس ناتيجەسىندە قىلمىستىق نەمەسە اكىمشىلىك قۇقىقبۇزۋشىلىق بەلگىلەرى انىقتالماعان. سوندىقتان بۇل ماسەلەنى ازاماتتىق سوت تارتىبىمەن شەشۋ ۇسىنىلعان.
قازاقستاندا سۋرروگات انا بولۋ زاڭمەن رۇقسات ەتىلگەن. بۇل قاتىناستار «نەكە (ەرلى-زايىپتىلىق) جانە وتباسى تۋرالى» زاڭمەن رەتتەلەدى. قۇجات سۋرروگات انانىڭ مەديسينالىق كومەكتى الۋىنا جانە كەلىسىلگەن سىياقىنى الۋىنا كەپىلدىك بەرەدى.
زاڭگەرلەردىڭ ايتۋىنشا، ايەل سوتقا جۇگىنىپ، ۋادە ەتىلگەن اقىنى تالاپ ەتە الادى. سونىمەن قاتار بيولوگيالىق اتا-انالار شەتەل ازاماتتارى بولعاندىقتان، جۇڭگو ەلشىلىگىنە جانە سىرتقى ىستەر مينيسترلىگىنە دە جۇگىنۋگە بولادى.
كەيبىر زاڭگەرلەر اتا-انالاردىڭ ارەكەتى بالانى قاراۋسىز قالدىرۋ رەتىندە قاراستىرىلۋى مۇمكىن ەكەنىن ايتادى.
ءقازىر جاڭا تۋعان ءسابي سابيلەر ۇيىندە دارىگەرلەردىڭ باقىلاۋىندا. ماماندار ونىڭ جاعدايىن تۇراقتى دەپ باعالاپ وتىر – بالا بىرتىندەپ سالماق قوسىپ كەلەدى.
ازىرگە نارەستە اتا-اناسى باس تارتقان بالا مارتەبەسىنە يە. ونىڭ ءارى قارايعى تاعدىرىن مەملەكەت شەشەدى.
