پاۆلودار وبلىسىنىڭ تۇرعىنى مەملەكەتتىك شەكارادان زاڭسىز پاترون الىپ وتپەك بولعانى ءۇشىن جاۋاپقا تارتىلدى، دەپ حابارلايدى Dala News.
سوت مالىمەتىنشە، وقيعا 2026 جىلعى 21 قاڭتاردا «نايزا» شەكارالىق باقىلاۋ بولىمىندە بولعان. ازامات جەكە Chevrolet Niva اۆتوكولىگىمەن مەملەكەتتىك شەكارانى كەسىپ وتپەك بولعان.
كولىكتى تەكسەرۋ بارىسىندا ونىڭ جۇكسالعىشىنان 12 كاليبرلى 4 اڭشىلىق پاترونى تابىلعان. تەرگەۋ كەزىندە ەر ادامنىڭ بۇل پاترونداردى ىشكى ىستەر ورگاندارىندا تىركەمەي زاڭسىز ساقتاپ، تاسىمالداعانى انىقتالعان.
سوتتا قۇقىق بۇزۋشى كىناسىن تولىق مويىنداپ، پاترونداردى ساقتاۋعا، اكەلۋگە نەمەسە اكەتۋگە قاتىستى ەشقانداي رۇقسات قۇجاتى جوق ەكەنىن ايتقان.
ۋسپەن اۋداندىق سوتىنىڭ شەشىمىمەن ازامات اكىمشىلىك قۇقىقبۇزۋشىلىق تۋرالى كودەكستىڭ 482-بابى 1-بولىگى بويىنشا كىنالى دەپ تانىلىپ، وعان 60 550 تەڭگە كولەمىندە ايىپپۇل سالىندى. سونىمەن قاتار تابىلعان پاتروندار تاركىلەندى.
سوت قاۋلىسى زاڭدى كۇشىنە ەندى.
