بۇگىن شىمكەنتتە «كرەديتتىك كووپەراسيا. ەرەكشەلىگىن ءبىل!» اتتى تاقىرىپتا ەلىمىزدەگى كرەديتتىك سەرىكتەستىكتەردىڭ حالىقارالىق ءى-فورۋمى ءوتتى. شارانى ەلىمىزدىڭ اۋىل شارۋاشىلىعى مينيسترلىگى، «اگرارلىق نەسيە كورپوراسياسى» اق مەن اگروونەركاسىپ كەشەنىندەگى كرەديتتىك سەرىكتەستىكتەر قاۋىمداستىعى زاڭدى تۇلعالار بىرلەستىگى ۇيىمداستىردى.  فورۋم جۇمىسىن اشىپ بەرگەن وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ بۇگىنگى شارانىڭ ماڭىزدىلىعىنا توقتالدى.



«مەملەكەت باسشىسى حالىققا ارناعان جولداۋىندا ءوزارا كرەديتتەۋ تۇرىندەگى قارجى مەن نەسيە قىزمەتتەرىن ۇسىنۋ بويىنشا تارماقتالعان قارجى جەلىسىنىڭ اسا قاجەت ەكەنىن اتاپ وتكەن ەدى. سونداي-اق، ەلباسى ەلىمىزدىڭ ەكونوميكالىق ىنتىماقتاستىق جانە دامۋ ۇيىمىنا (ارى قاراي – ەىدۇ) مۇشە ەلدەردىڭ ستاندارتتارىنا كوشۋ قاجەتتىگىن جۇكتەگىن بولاتىن. ويتكەنى، اۋىل شارۋاشىلىعى ءونىم وندىرۋشىلەرىنىڭ قارجىلاندىرۋعا قولجەتىمدىلىگى – اگرارلىق سەكتوردىڭ باسەكەگە قابىلەتتىلىگىن باعالاۋدا باستى ولشەم بولىپ تابىلادى. سوندىقتان بۇگىنگى شاراعا قاتىسۋشالارعا العىسىمىمدى ءبىلدىرىپ، الداعى ۋاقىتتا تىعىز قارىم –قاتىناستا جۇمىس ىستەۋگە شاقىرامىن»، – دەدى جانسەيىت قانسەيىت ۇلى.

200-گە جۋىق ادامنىڭ باسىن قوسقان حالىقارالىق فورۋمعا كرەديتتىك سەرىكتەستىكتەر، «قازاگرو» حولدينگى، «اتامەكەن» ۇكپ مەن قازاقستان قارجىگەرلەرى قاۋىمداستىعىنىڭ وكىلدەرى قاتىستى. بۇدان وزگە، رەسەي مەن ليتۆادان ارنايى كەلگەن كرەديتتىك كووپەراسيا جەتەكشىلەرى دە بار.

ايتا كەتەيىك، ەلىمىزدەگى كرەديتتىك سەرىكتەستىكتەردىڭ دامۋ تاريحى سوناۋ 2001 جىلدان باستاۋ الادى. كرەديتتىك سەرىكتەستىك ينستيتۋتى قۇرىلعالى بەرى، 16 جىل ىشىندە ولاردىڭ سانى 187-گە جەتتى. العاش قۇرىلعان كەزدە قاتىسۋشىلاردىڭ سانى 800-دەن اسپاعان بولسا، قازىرگى تاڭدا كرەديتتىك سەرىكتەستىك قاتىسۋشىلارىنىڭ سانى 15 600ء-دى قۇراپ وتىر.  وسى ۋاقىتقا دەيىن نەسيە سەرىكتەستىكتەرى ارقىلى شارۋالارعا 241 ميلليارد تەڭگەنىڭ 40 مىڭنان استام زايمى بەرىلگەن.

فورۋم اياسىندا «كرەديتتىك سەرىكتەستىكتەردىڭ دامۋ ستراتەگياسى: قارجى ينستيتۋتى رەتىندە كرەديتتىك كووپەراسيانىڭ بولاشاعى»، سونداي-اق كرەديتتىك سەرىكتەستىكتەر ءۇشىن سەرۆيستەر مەن قىزمەتتەر جايى تالقىلاندى. نەسيەلىك سەرىكتەستىك وكىلدەرى اسىرەسە رەسەي جانە ليتۆاداعى كرەديتتىك كووپەراسيا ينستيتۋتتارىنىڭ دامۋ تاجىريبەسىنە قىزىعۋشىلىق تانىتتى.

فورۋم اياسىندا «اوك كرەديتتىك سەرىكتەستىكتەر قاۋىمداستىعى» زاڭدى تۇلعالار بىرلەستىگى مەن ليتۆانىڭ كرەديتتىك وداقتار قاۋىمداستىعى اراسىندا ىنتىماقتاستىق جونىندە مەموراندۋمعا قول قويىلدى. ياعني، كورشى ەلدەردىڭ كووپەراتيۆتىك باۋىرلاستىعى ءسوز جۇزىندە ەمەس، ءىس جۇزىندە ىسكە اسىپ وتىر. فورۋم سوڭىندا ۇزدىك كرەديتتىك سەرىكتەستىك وكىلدەرى ارنايى ديپلومدارمەن ماراپاتتالدى.

وقو اكىمىنىڭ باسپا ءسوز قىزمەتى