مۇنداي شەشىمگە قازاقستان كينەماتوگرافيستەر ليگاسى سەبەپ بولعان. ولار وپەراتور ەركىنبەك پتىرالييەۆ ۇلتتىق ىرىكتەۋ كوميسسياسىنىڭ مۇشەسى بولعانىن ايتىپ، ول ءوز فيلمىنە داۋىس بەرگەن بولۋى مۇمكىن دەگەن ءۋاج كەلتىرگەن.
"بۇل شىندىققا سايكەس كەلمەيدى، جانە رەسمي تۇردە راستالعانىنا قاراماستان، وسىنداي جاعداي بولىپ وتىر. كينەماتوگرافيستەر ليگاسى "بەدەلگە نۇقسان كەلۋى مۇمكىن" دەپ الاڭداعانىمەن، ءىس جۇزىندە بۇل ونىڭ ءتورايىمىنىڭ جەكە كوزقاراسىنان تۋعان جاعداي"، - دەپ جازدى ەرلان بۋحاربايەۆ.
ال كينەماتوگرافيستەر ليگاسى بۇل سوزدەردى جوققا شىعاردى. ولار جىبەرىلگەن حات فيلمدەرگە نەمەسە ادامدارعا ەمەس، ۇلتتىق ىرىكتەۋ كەزىندە اشىقتىق پەن ادىلدىك ساقتالۋىنا قاتىستى بولعانىن ايتتى.
"ماسەلە فيلمدە ەمەس، كاسىبي قاعيدالاردى ساقتاۋ كەرەك. شەشىمدەر ءادىل قابىلدانسا، وعان ەل ىشىندە دە، حالىقارالىق دەڭگەيدە دە سەنىم ارتادى. قازاقستاندىق كينو حالىقارالىق مويىنداۋعا لايىق، ءبىراق ول اشىق جانە ادال پروسەستەرسىز، كورەرمەن مەن اۆتورعا قۇرمەتسىز مۇمكىن ەمەس"، - دەپ جازدى ليگا وكىلدەرى.
"كادەت" ءفيلمى توڭىرەگىندەگى جاعداي قازاقستاندىق كينو سالاسىنا ىشكى تۇسىنىستىك پەن جاۋاپكەرشىلىكتى دامىتۋ قاجەت ەكەنىن كورسەتتى. داۋلاردى ەل ىشىندە شەشىپ، حالىقارالىق دەڭگەيگە شىعارماۋ كەرەك دەگەن وي ايتىلدى.
الايدا ءوتىنىم قابىلداۋ مەرزىمى ءوتىپ كەتكەندىكتەن، باسقا فيلم ۇسىنۋعا مۇمكىندىك جوق. دەمەك، قازاقستان 2026 جىلعى "وسكارعا" قاتىسپايدى جانە سول ارقىلى جۇلدەدەن دە، نوميناسيادان دا ايىرىلدى.
