ايماق باسشىسى وبلىستىق اكىمدىك وتىرىسىندا تازا اۋىز سۋمەن قامتۋ ماسەلەسىنە اۋدان اكىمدەرىنىڭ بىلەك سىبانا، بەلسەندى تۇردە كىرىسۋىن تاپسىردى. قازىرگى تاڭدا وكىنىشكە وراي، كوكپەكتى، جارما، ۇلان جانە تارباعاتاي اۋداندارىندا بۇل باعىتتاعى جۇمىستار اقساپ تۇر.



سوڭعى بەس جىل كولەمىندە وبلىستا «اق بۇلاق» جانە «نۇرلى جول» باعدارلامالارى اياسىندا 36،6 ملرد. تەڭگەگە 110 سۋمەن قامتۋ نىسانى سالىندى. بيىل ولاردىڭ قاتارى 47 جوبامەن تولىقتى. بۇل رەتتە ايماق باسشىسى اۋدان اكىمدەرىنە قاراجاتتى ەسەپ ءۇشىن ەمەس، حالىقتىڭ شىنايى يگىلىگى ءۇشىن جۇمساۋ كەرەكتىگىن ەسكەرتتى.

– 135 اۋىلعا سۋ تارتتىق دەپ ەسەپ بەرەي سالماي، حالىق قاي اۋىلدا كوپ شوعىرلانعان، ءبىرىنشى سول ەلدى-مەكەندەرگە تارتۋ كەرەك. ايتپەسە، كورسەتكىش ءۇشىن جۇمىستى تەز-تەز بىتىرۋگە بولادى. ءبىراق، ەڭ ءبىرىنشى حالىقتىڭ قامىن، اتقارىلار ءىستىڭ ساپاسىن ويلاۋىمىز كەرەك. ءار جوبا ءۇشىن اۋدان باسشىلارى جەكە-جەكە جاۋاپ بەرەدى، – دەدى وبلىس اكىمى دانيال احمەتوۆ.

بۇگىندە سۋمەن قامتۋ دەڭگەيى وڭىردەگى ورتا كورسەتكىشتەن تومەن اۋدانداردا وبلىس اكىمىنىڭ تاپسىرماسى بويىنشا ارنايى جۇمىس توبى تالداۋ جۇرگىزۋدە. جالپى 2020 جىلعا دەيىن ايماقتاعى اۋىلداردىڭ 62 پايىزىن تازا اۋىز سۋمەن قامتۋ جوسپارلانىپ وتىر.

 

شقو اكىمىنىڭ باسپا ءسوز قىزمەتى