قايتارىلعان اكتيۆتەردى باسقارۋ كومپانياسى كارىم ماسىموۆكە تيەسىلى بولعان، الايدا مەملەكەت مەنشىگىنە وتكەن كوللەكسيالىق ساعاتتاردى، الەمدىك برەندتەردىڭ زەرگەرلىك اشەكەيلەرىن جانە سيرەك اكسەسسۋارلاردى تاعى دا اۋكسيونعا شىعاردى، دەپ حابارلايدى Dalanews.kz.
لوتتار اراسىندا - Patek Philippe، Franck Muller، Harry Winston ساعاتتارى، Van Cleef & Arpels، DE BEERS، Yana Jewellery سەكىلدى ليۋكس ساناتىنداعى اشەكەيلەر بار.
بۇدان بولەك، ساۋداعا ءتورت ەرەكشە لوت قويىلدى - كوللەكسيالىق مونەتالار، قىلىش جانە ۇلتتىق ورنەگى بار بەلدىك. قۇجاتتارعا قاراعاندا، بۇل زاتتار بۇعان دەيىن سوتتالعان ۇقك ەكس-توراعاسى كارىم ءماسىموۆتىڭ ۇيىنەن تاركىلەنگەن مۇلىكتەر تىزىمىنە ساي كەلەدى.
42 لوتتىڭ ىشىندە قايتارىلعان اكتيۆتەردى باسقارۋ كومپانياسى تەك بىرەۋىن عانا ساتا الدى. ساتىپ الۋشى «قىنابىمەن سامۋراي قىلىشىن» 542 719 تەڭگەگە ساتىپ العان. قىلىش بولاتتان جاسالعان، قىنابى قارا ءتۇستى ماتەريالدان، ال سابى بەدەرلى گەومەتريالىق ورنەكتەرمەن اشەكەيلەنگەن. ايتا كەتەرلىگى، ءدال وسىنداي قىلىش ءماسىموۆتىڭ ۇيىنەن تاركىلەنگەن مۇلىك تىزىمىندە دە كورسەتىلگەن.
ەڭ قىمبات لوتتارعا ساتىپ الۋشى تابىلمادى. ولاردىڭ ىشىندە قۇنى 150 ميلليون تەڭگە بولاتىن پلاتينادان جاسالعان Ulysse Nardin Classic 789-80 ساعاتتارى بار. ساعات سيفەربلاتى اۆانتيۋريننەن جاسالعان، وندا التىننان قۇيىلعان جاۋىنگەرلەر بەينەلەنگەن، ولار ساعات سوققان ساتتە قوزعالادى.
لوت سيپاتتاماسىندا الەمدە بۇل مودەلدىڭ بار-جوعى 30 داناسى بار ەكەنى كورسەتىلگەن. سونىڭ ءبىرى قازاقستاندىققا تيەسىلى بولعان. الايدا بۇل جولى دا ساعات ساتىپ الىنبادى. قايتارىلعان اكتيۆتەردى باسقارۋ كومپانياسى ولاردى 2024 جىلدىڭ قازانىنان بەرى ساتۋعا تىرىسىپ كەلەدى - سول كەزدە باستاپقى باعا 214 ميلليون تەڭگە بولعان.
