2025 جىلدىڭ باسىنان بەرى كامەلەتكە تولماعاندار ىستەرى جانە ولاردىڭ قۇقىقتارىن قورعاۋ جونىندەگى كوميسسيالار شامامەن 4 مىڭ وتىرىس وتكىزىپ، 7 مىڭنان اسا ءىستى قاراعان. ونىڭ ىشىندە مىڭنان اسا ءىس قيىن جاعدايعا تاپ بولعان وتباسىلارعا قاتىستى، دەپ حابارلايدى Dalanews.kz.
بۇگىندە ەلىمىزدە بالالاردىڭ قۇقىقتارىن قورعاۋ، قۇقىقبۇزۋشىلىقتىڭ الدىن الۋ جانە وتباسىلاردى قولداۋ باعىتىندا مەملەكەتتىك ورگانداردىڭ ءوزارا ءىس-قيمىلىن ۇيلەستىرەتىن 271 كوميسسيا جۇمىس ىستەيدى.
"كامەلەتكە تولماعاندار ىستەرى جونىندەگى كوميسسيالار – بالالاردىڭ قۇقىعىن قورعاۋدىڭ باستى تەتىگى. كوميسسيالاردىڭ قىزمەتى - قيىن جاعدايعا تاپ بولعان وتباسىلاردى دەر كەزىندە انىقتاپ، ولارعا كومەك كورسەتۋ. ءبىز ۆەدومستۆوارالىق ءوزارا ءىس-قيمىلدى كۇشەيتىپ، بۋللينگتىڭ، كيبەربۋللينگتىڭ جانە ءسۋيسيدتىڭ الدىن الۋ باعىتىندا جاڭا تاسىلدەر ەنگىزىپ جاتىرمىز"، – دەدى ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتوراعاسى ناسىمجان وسپانوۆا.
قۇقىق قورعاۋ ورگاندارىمەن بىرلەسىپ جۇرگىزىلگەن ۆەدومستۆوارالىق رەيدتەردىڭ ناتيجەسىندە بالالاردى تاربيەلەۋ جونىندەگى مىندەتىن ورىنداماعان 21،8 مىڭنان اسا اتا-انا، تۇنگى ۋاقىتتا كامەلەتكە تولماعانداردىڭ تۇرعىن ۇيدەن تىس جەردە بولۋىنا جول بەرگەن 107 مىڭنان اسا زاڭدى وكىل، سونداي-اق، ويىن-ساۋىق ورىندارىنا بالالاردى كىرگىزگەن 2 مىڭعا جۋىق كاسىپكەر اكىمشىلىك جاۋاپكەرشىلىككە تارتىلعان.
