اۋىل شارۋاشىلىعى سالاسىنداعى ساراپشى تولەۋتاي راحىمبەكوۆ الداعى جىلدارى قازاقستاندا ەتتىڭ ەداۋىر قىمباتتايتىنىن مالىمدەدى. ونىڭ ايتۋىنشا، جاقىن جىلدارى سيىر ەتىنىڭ باعاسى ءبىر كيلوگرامى ءۇشىن 15–20 مىڭ تەڭگەگە دەيىن ءوسۋى مۇمكىن، ال قازاقستانعا ءتىپتى وزبەكستاننان ەت ساتىپ الۋعا تۋرا كەلۋى ىقتيمال، دەپ حابارلايدى Dalanews.kz.

"بولاشاقتا ءبىز ۇلتتىق بەشبارماعىمىزعا وزبەك ەتىن سالاتىن بولامىز. ءبىراق ول كەزدە ونىڭ باعاسى 15–20 مىڭ تەڭگە تۇرادى"، – دەدى راحىمبەكوۆ Tenge Talks YouTube-ارناسىنا بەرگەن سۇحباتىندا.

بۇرىنعى بولجامى راستالعان

ساراپشى 2019 جىلى-اق ەت باعاسى 5–6 مىڭ تەڭگەگە دەيىن وسەتىنىن ەسكەرتكەنىن جانە سول بولجامىنىڭ ءدال كەلگەنىن ەسكە سالدى.

"سول كەزدە مەنى سىناعاندار كوپ بولدى، ءبىراق ايتقانىم ءدال كەلدى. مەن جاعدايدى ىشىنەن بىلەمىن، سوندىقتان وسىنداي قورىتىندى جاسايمىن"، – دەدى ول.

نەگىزگى سەبەپتەر

راحىمبەكوۆتىڭ ايتۋىنشا، قازىرگى تاڭدا ەلدەگى مالدىڭ 80–90 پايىزى ۇساق شارۋاشىلىقتاردا، ولاردىڭ ءوز تەحنيكاسى جوق، ال ءونىمنىڭ وزىندىك قۇنىنىڭ نەگىزگى بولىگى جەم مەن شوپكە كەتەدى.

"تەحنولوگيا بار، ءبىراق ءبىز ونى ۇمىتتىق. ۇساق شارۋاشىلىقتاردا تەك جايىلىم ءشوبى عانا قالادى. قۋاڭشىلىق بولا قالسا – باعا بىردەن كوتەرىلەدى"، – دەپ ءتۇسىندىردى ساراپشى.

ءماجىلىس دەپۋتاتىنىڭ پىكىرى

بۇعان دەيىن ءماجىلىس دەپۋتاتى رينات زايىتوۆ اۋىل شارۋاشىلىعى ونىمدەرىنىڭ باعاسىنداعى الشاقتىققا نارازىلىعىن بىلدىرگەن بولاتىن. ونىڭ ايتۋىنشا، اۋىلداعى شارۋالار ەتتى 3000 تەڭگەدەن ساتسا، قالالاردا ونىڭ باعاسى 6000 تەڭگەگە دەيىن جەتەدى.

دەپۋتات بارلىق تابىستى دەلدالدار الىپ وتىرعانىن، ال ناعىز وندىرۋشىلەردىڭ نارىق پەن جارمەڭكەلەرگە شىعۋعا مۇمكىندىگى جوق ەكەنىن اتاپ وتكەن.