ىشكى ىستەر مينيسترلىگى ەسىرتكى قۇرالدارىنىڭ زاڭسىز اينالىمىمەن بايلانىستى قىلمىستاردى انىقتاۋ جانە توقتاتۋ بويىنشا بەلسەندى جۇمىسىن جالعاستىرۋدا، دەپ حابارلايدى Dalanews.kz Polisia.kz – عا سىلتەمە جاساپ.
ەرەكشە نازار جاسوسپىرىمدەر مەن جاستار اراسىنداعى، سونىڭ ىشىندە كامەلەتكە تولماعانداردىڭ ەسىرتكى ورتاسىنا تارتىلۋىنا جول بەرمەۋ شارالارىنا اۋدارىلىپ وتىر. شامامەن 17 مىڭعا جۋىق ەسىرتكىگە قارسى ءىس-شارا وتكىزىلدى، جاسوسپىرىمدەر مەن جاستاردى قامتۋ سانى 2 ميلليون ادامدى قۇرادى.
الايدا قابىلدانىپ جاتقان شارالارعا قاراماستان، كامەلەتكە تولماعانداردىڭ ەسىرتكى قۇرالدارىن تاراتقانى ءۇشىن ۇستالۋ فاكتىلەرىنىڭ ءوسۋ ءۇردىسى ساقتالىپ وتىر.
ماسەلەن، اباي وبلىسىندا پوليسيا قىزمەتكەرلەرى كوللەدجدىڭ ءبىرىنشى كۋرسىندا وقيتىن كامەلەتكە تولماعان قىزدى اسا ءىرى كولەمدە پسيحوتروپتىق زاتتاردى زاڭسىز ساقتاعانى ءۇشىن ۇستادى. ءتىنتۋ بارىسىندا 16 گر سينتەتيكالىق ەسىرتكى تاركىلەندى.
شىعىس قازاقستان وبلىسىندا ەسىرتكى ساتقان تاعى ءبىر كامەلەتكە تولماعان ءجاسوسپىرىم ۇستالدى. ول الماتى قالاسىندا تۇرىپ، وسكەمەنگە كەلىپ، ءبىر اي بويى تىيىم سالىنعان زاتتاردى ساتۋمەن اينالىساتىن ينتەرنەت-دۇكەننىڭ كۋرەرى-قويماشىسى بولىپ جۇمىس ىستەگەن. ۇستاۋ بارىسىندا ودان α-PVP توبىنا جاتاتىن 3 گر سينتەتيكالىق ەسىرتكى تاركىلەندى.
«بۇگىنگى تاڭدا رەسپۋبليكا بويىنشا ەسىرتكىنىڭ زاڭسىز اينالىمىنا تارتىلعان 60-تان استام كامەلەتكە تولماعان ءجاسوسپىرىم ۇستالدى. ىشكى ىستەر مينيسترلىگى اتا-انالاردى بالالارىنىڭ قارىم-قاتىناس ورتاسىنا مۇقيات نازار اۋدارۋعا، سونداي-اق جاسوسپىرىمدەرگە “جەڭىل تابىس” نەمەسە “قاشىقتىقتان جۇمىس” ۇسىنۋى مۇمكىن كۇماندى الەۋمەتتىك جەلىلەر مەن مەسسەندجەرلەردى تەكسەرۋگە شاقىرادى.
ءىىم ەسكە سالادى: ەسىرتكى جانە پسيحوتروپتىق زاتتاردى ساتۋ ءۇشىن ءومىر بويىنا باس بوستاندىعىنان ايىرۋعا دەيىنگى قىلمىستىق جاۋاپكەرشىلىك كوزدەلگەن؛ الداعى ۋاقىتتا كامەلەتكە تولماعاننىڭ ەسىرتكىنىڭ زاڭسىز اينالىمىنا اتا-اناسىنىڭ كىناسى نەمەسە ءتيىستى باقىلاۋدىڭ بولماۋىنان تارتىلعانى انىقتالسا، اتا-انالىق مىندەتتەرىن تيىسىنشە ورىنداماعانى ءۇشىن جاۋاپكەرشىلىكتى قاتاڭداتۋ جوسپارلانۋدا»، — دەلىنگەن حابارلامادا.
