استانا پوليسيا دەپارتامەنتىنىڭ كيبەرقىلمىسپەن كۇرەس باسقارماسى ينتەرنەت-الاياقتىقتىڭ ۇلكەن ءىسىن اشتى، ونىڭ قۇربانى استانالىق 87 جاستاعى تۇرعىن بولدى دەپ حابارلايدى Dalanews.kz. Polisia.kz سىلتەمە جاساپ.
وقيعا تامىز ايىندا بولدى. زەينەتكەرگە مەسسەندجەر ارقىلى بەلگىسىز ادامدار حابارلاسىپ، وزدەرىن پوليسيا قىزمەتكەرى مەن ۇلتتىق بانك قىزمەتكەرى دەپ تانىستىرعان. الاياقتار زەينەتكەرگە بەلگىسىز بىرەۋلەر ونىڭ پاتەرىن قايتا تىركەۋدى كوزدەپ، ونى ساۋداعا شىعارعانىن حابارلاعان. “مۇلكىن ساقتاۋ ءۇشىن” ەر ادامعا پاتەردى ساتىپ، تۇسكەن اقشانى “ءقاۋىپسىز ەسەپشوتقا” اۋدارۋعا ۇسىندى. زارداپ شەككەن ادامعا ءىىم مەن ۇلتتىق بانك الاياقتاردى ۇستاۋ ءۇشىن قۇپيا وپەراسيا جۇرگىزىپ جاتىر دەپ سەندىرىپ، ءتىپتى تۋىستارىنا دا بۇل تۋرالى حابارلاماۋعا ماجبۇرلەگەن.
ولاردىڭ نۇسقاۋلارىن ورىنداپ، ەر ادام ريەلتورلىق كومپانياعا جۇگىنىپ، پاتەرىن ساتتى دا 39 ملن تەڭگەنى “ءقاۋىپسىز ەسەپشوتقا اۋدارۋ” ءۇشىن كۋرەرگە تاپسىردى.
بۇل دەرەك بويىنشا الدىن الا تەرگەۋ باستالدى. وپەراتيۆتىك شارالار بارىسىندا پوليسيا قىزمەتكەرلەرى قىلمىسقا قاتىسى بار 23 جاستاعى ازاماتتى انىقتاپ، ۇستادى. ودان 39 ملن تەڭگە مولشەرىندەگى اقشا تاركىلەندى. ۇستالعان ادام ۋاقىتشا ۇستاۋ يزولياتورىنا قامالدى، ال تاركىلەنگەن قاراجات زارداپ شەككەنگە قايتارىلدى.
