اۋىل شارۋاشىلىعى ۆيسە-مينيسترى ەرمەك كەنجەحان ۇلى قىتايدىڭ «Hopefull Grain & Oil Group» كومپانياسىنىڭ وكىلدەرىمەن كەزدەستى، دەپ حابارلايدى Dalanews.kz.
كەلىسسوز بارىسىندا تاراپتار اقمولا وبلىسىندا ءداندى داقىلداردى تەرەڭ وڭدەۋ زاۋىتىن سالۋ جونىندەگى ينۆەستيسيالىق جوبانى ىسكە اسىرۋ ماسەلەلەرىن تالقىلادى.
كومپانيانىڭ ەلىمىزدەگى جوبا جەتەكشىسى ياو ياو مىرزا قازاقستاندىق تاراپقا كورسەتىلگەن قولداۋ ءۇشىن العىسىن ءبىلدىرىپ، كومپانيانىڭ اگرارلىق سالادا ۇزاق مەرزىمدى ىنتىماقتاستىق ورناتۋعا مۇددەلى ەكەنىن اتاپ ءوتتى.
جوبانىڭ قولعا الىنۋى 2024–2025 جىلدارداعى ەكىجاقتى كەلىسسوزدەردىڭ ناتيجەسى دەۋگە بولادى. جاھاندىق ينۆەستيسيالار جونىندەگى دوڭگەلەك ۇستەل (KGIR-2025) اياسىندا اقمولا وبلىسى اكىمدىگى مەن «Hopefull Grain & Oil Group» كومپانياسى اراسىندا ءداندى داقىلداردى تەرەڭ وڭدەۋ زاۋىتىن سالۋ جوباسىن ىسكە اسىرۋ تۋرالى ستراتەگيالىق كەلىسىمگە قول قويىلدى.
كومپانيا ەكولوگيالىق تازا تەحنولوگيالاردى پايدالانا وتىرىپ، ءداندى داقىلداردى تەرەڭ وڭدەۋگە باعىتتالعان جوعارى تەحنولوگيالى اگروونەركاسىپتىك كەشەننىڭ قۇرىلىسىنا 1،5 ميلليارد اقش دوللارىن ينۆەستيسيالاۋدى جوسپارلاپ وتىر.
جوبانى ىسكە اسىرۋ ەكى كەزەڭنەن تۇرادى. ءبىرىنشى كەزەڭدە – جاڭارتىلاتىن ەنەرگيا كوزدەرىنەن قۋات وندىرەتىن جىلۋ ەلەكتر ورتالىعىن (جەو) سالۋ كوزدەلگەن. ەكىنشى كەزەڭدە – ليمون قىشقىلىن، گليۋكوزا-فرۋكتوزا ءشارباتتارىن، بيوەتانولدى، مال ازىقتىق جانە اقۋىزدى كونسەنتراتتاردى وندىرۋگە باعىتتالعان ءداندى داقىلداردى تەرەڭ وڭدەۋ زاۋىتى ىسكە قوسىلادى.
بۇدان بولەك، ينۆەستور قاجەتتى ەنەرگيا، كولىك جانە ينجەنەرلىك ينفراقۇرىلىممەن قامتاماسىز ەتىلگەن يندۋستريالىق پارك قۇرۋ مۇمكىندىگىن دە قاراستىرىپ وتىر.
كەزدەسۋدى قورىتىندىلاي كەلە، ۆيسە-مينيستر ەرمەك كەنجەحان ۇلى:
«اۋىل شارۋاشىلىعى مينيسترلىگى ءداندى داقىلداردى تەرەڭ وڭدەۋدى دامىتۋ مەن وتاندىق ءونىمنىڭ قوسىلعان قۇنىن ارتتىرۋعا باعىتتالعان ماڭىزدى جوبانى ىسكە اسىرۋعا جان-جاقتى قولداۋ كورسەتۋگە دايىن»،-دەپ اتاپ ءوتتى.
