اقمولا وبلىسىندا اۋا رايىنىڭ كۇرت ناشارلاۋىنا بايلانىستى قىسقى شينالارى جوق 1064 اۆتوكولىكتىڭ جولعا شىعۋى ۋاقىتشا شەكتەلدى، دەپ حابارلايدى Dalanews.kz ىشكى ىستەر مينيسترلىگىنىڭ رەسمي سايتىنا سىلتەمە جاساپ
مينيسترلىكتىڭ مالىمەتىنشە، وڭىردە قاتتى كوكتايعاقتىڭ پايدا بولۋىنا بايلانىستى پوليسيا قىزمەتكەرلەرى كۇشەيتىلگەن رەجيمدە جۇمىس ىستەي باستادى. تەك العاشقى كۇنى-اق جازعى شينالارمەن جۇرگەن 1064 كولىك قوزعالىستان ۋاقىتشا توقتاتىلعان.
مۇنداي جاعدايلاردىڭ باسىم بولىگى وبلىستىق جانە رەسپۋبليكالىق ماڭىزى بار تراسسالاردا تىركەلگەن – 430 دەرەك. كوكشەتاۋ قالاسىندا شامامەن 100 كولىككە شەكتەۋ قويىلعان، قالعاندارى اۋداندىق جولداردا انىقتالعان.
"بىرنەشە مارتە ەسكەرتۋ جاسالعانىنا قاراماستان، كەي جۇرگىزۋشىلەر جازعى رەزەڭكەمەن جولعا شىعۋعا تاۋەكەل ەتتى. الايدا قابىلدانعان شارالاردىڭ جانە پاترۋلدەردىڭ ۇيلەسىمدى جۇمىسىنىڭ ارقاسىندا بۇل كۇنى زارداپ شەككەن نەمەسە قازا تاپقان ادامدارمەن جول اپاتى تىركەلگەن جوق"، – دەدى اقمولا وبلىسى پد باستىعىنىڭ ورىنباسارى سەرىك ابۋتاليپوۆ.
پاترۋلدىك قىزمەت وكىلدەرى جولدا قيىن جاعدايعا تاپ بولعان جۇرگىزۋشىلەرگە كومەك كورسەتكەن. سونىمەن قاتار ايماقتىڭ جول قىزمەتتەرى تاۋلىك بويى كوكتايعاقتىڭ سالدارىن جويۋمەن اينالىستى. رەسپۋبليكالىق ماڭىزى بار تراسسالاردى وڭدەۋ ءۇشىن 190 ارنايى تەحنيكا جانە 900 توننادان استام كوكتايعاققا قارسى ماتەريال پايدالانىلعان.
