وڭتۇستىك قازاقستاندا 10 جاڭا سۋ قويماسى سالىنادى، دەپ حابارلايدى Dalanews.kz سۋ رەسۋرستارى جانە يرريگاسيا مينيسترلىگىنە سىلتەمە جاساپ.
سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ جامبىل وبلىسى تۇرعىندارىمەن وتكەن ەسەپتى كەزدەسۋدە ۆەگەتاسيالىق كەزەڭنىڭ قورىتىندىسىن شىعارىپ، وڭىردەگى نەگىزگى جوبالار تۋرالى ايتتى.
2028 جىلعا دەيىنگى سۋ سالاسىن دامىتۋدىڭ كەشەندى جوسپارىنا سايكەس، وبلىستا 10 جاڭا سۋ قويماسىن سالۋ جانە 3 سۋ قويماسىن رەكونسترۋكسيالاۋ جوسپارلانعان. سونداي-اق ماماندار 45 گيدروتەحنيكالىق نىسانعا زەرتتەۋ جۇمىستارىن جۇرگىزەدى.
2026 جىلى مينيسترلىك اقمولا جانە قالعۇت سۋ قويمالارىنىڭ قۇرىلىسىن، سونداي-اق تەرىس-اششىبۇلاق جانە قاراقونىز سۋ قويمالارىن قايتا جاڭعىرتۋدى باستايدى. سونىمەن قاتار وبلىس اكىمدىگى جەتى جاڭا نىسانعا جوبالىق-سمەتالىق قۇجاتتاما ازىرلەۋدى قولعا الدى.
جەرگىلىكتى تۇرعىندار مينيسترگە سۋارۋ ارنالارىنىڭ جوندەلۋىنە قاتىستى سۇراقتار قويدى. نۇرجىگىتوۆتىڭ ايتۋىنشا، ءقازىر بەس اۋداندا ۇزىندىعى 415 شاقىرىم بولاتىن 76 ارنانى قايتا جاڭعىرتۋ جوباسى جۇزەگە اسىرىلىپ جاتىر. بۇل 24 مىڭ گەكتاردان استام سۋىرمالى القاپقا سۋ جەتكىزۋدى جاقسارتۋعا مۇمكىندىك بەرەدى.
بۇدان بولەك، ارنالاردى قايتا جاڭعىرتۋدىڭ 23 جوباسى اياقتالۋعا جاقىن. بۇل تاعى 19،7 مىڭ گەكتار ەگىستىك القاپتىڭ سۋمەن قامتىلۋىن ارتتىرۋعا مۇمكىندىك بەرەدى. جىل سوڭىنا دەيىن جالپى ۇزىندىعى 103 شاقىرىمنان اساتىن بەس جوبانى اياقتاۋ جوسپارلانىپ وتىر.
