پاۆلودار ەپارحياسىنا قاراستى ەرتىس اۋدانىندا ورنالاسقان اۋليە الەكساندر نيەۆسكيي حرامىنىڭ ءدىني قىزمەتكەرى اندرەي اندرەيەۆ قاسيەتتى پاسحا مەرەكەسىنە وراي قازاق تىلىندە قۇتتىقتاۋ جولدادى، دەپ حابارلايدى Dalanews.kz.
“بارشاڭىزدى جارقىن دا شۋاقتى پاسحا مەرەكەسىمەن شىن جۇرەكتەن قۇتتىقتايمىن! بۇل كۇن – ادامزاتقا ءۇمىت پەن مەيىرىمنىڭ نۇرىن شاشقان قاسيەتتى مەيرام”، – دەدى ءدىني قىزمەتكەر.
ول پاسحانىڭ رۋحاني مانىنە توقتالىپ، بۇل مەرەكەنىڭ بىرلىك پەن بەيبىتشىلىككە ۇندەيتىنىن اتاپ ءوتتى. سونىمەن قاتار ءار وتباسىعا باق-بەرەكە، ەلگە تىنىشتىق، حالىققا ىنتىماق تىلەدى.
“جاراتقاننىڭ راقىمى ەلىمىزگە تىنىشتىق پەن كەلىسىم سىيلاپ، حالقىمىزدى ىنتىماق پەن بىرلىككە جەتەلەي بەرگەي. پاسحا قۋانىشى ءار وتباسىنىڭ داستارحانىنان ۇزىلمەسىن. حريستوس ءتىرىلدى! شىن مانىندە ءتىرىلدى!”، – دەدى اندرەي اندرەيەۆ.
ءقازاقتىلدى قاۋىم ءدىني قىزمەتكەردىڭ قازاقشا قۇتتىقتاۋىن جىلى قابىلداپ، ونىڭ بۇل باستاماسى حالىقتار دوستىعى مەن ءوزارا سىيلاستىقتى نىعايتۋعا قوسىلعان يگى ۇلەس ەكەنىن اتاپ ءوتتى.
بۇگىن – پراۆوسلاۆ سەنىمىندەگى ازاماتتار ءۇشىن قاسيەتتى سانالاتىن پاسحا مەرەكەسى. قازاقستاندا 130-دان استام ۇلت پەن ۇلىس وكىلدەرى ءبىر شاڭىراق استىندا بەيبىت ءومىر ءسۇرىپ كەلەدى. ەل اۋماعىندا پراۆوسلاۆيەلىك سەنىمدى ۇستاناتىن 300-گە جۋىق شىركەۋ مەن عيبادات ورنى بار. ولاردىڭ ىشىندە الماتىداعى ۆوزنەسەنسكيي كافەدرالدى سوبورى، استاناداعى ۋسپەنسكيي كافەدرالدى سوبورى جانە پاۆلودارداعى بلاگوۆەششەنسك كافەدرالدى سوبورى ەرەكشە تانىمال.
قازاقستانداعى پراۆوسلاۆ قاۋىمىنىڭ نەگىزگى بولىگى ورىس، ۋكراين جانە بەلارۋس دياسپورالارىنىڭ وكىلدەرى بولىپ تابىلادى. دەگەنمەن، كەيىنگى جىلدارى پاسحا مەرەكەسىن اتاپ وتۋشىلەردىڭ اراسىندا وزگە ۇلت وكىلدەرى دە كوبەيگەن. بۇل ەلىمىزدە قالىپتاسقان ءدىنارالىق كەلىسىمنىڭ جارقىن كورىنىسى.
پاسحا – بىرلىك پەن ىزگىلىكتى ناسيحاتتايتىن مەيرام. وسى كۇنى شىركەۋلەردە مەرەكەلىك قۇلشىلىقتار وتكىزىلىپ، حالىق بىر-بىرىنە «حريستوس ءتىرىلدى!» دەپ قۇتتىقتاۋ ايتىپ، «شىن مانىندە ءتىرىلدى!» دەپ جاۋاپ بەرەدى. قازاقستاندا پاسحا مەيرامى قوعامدىق كەلىسىمدى نىعايتۋعا ىقپال ەتىپ، ءتۇرلى مادەنيەتتەر مەن ءدىني سەنىمدەردىڭ ءوزارا سىيلاستىعىن ارتتىرۋعا سەپتىگىن تيگىزۋدە.
