استانادا ءومىر سۇرەتىن ءتۇرلى ەتنوستاردىڭ وكىلدەرى اراسىندا دوستىق، سىيلاستىق جانە ءوزارا قارىم-قاتىناستى نىعايتۋعا باعىتتالعان اكسيا ءوتتى، دەپ حابارلايدى ەلوردا اكىمدىگىنىڭ رەسمي سايتى.
ءىس-شارا پاسحا مەرەكەسىنە وراي موناستىر عيباداتحاناسىنىڭ الدىنداعى الاڭدا ءوتتى.
سالتاناتتى ليتۋرگيا مەن كرەست جورىعىنان كەيىن عيباداتحانا اۋماعىندا سيمۆولدىق تاتتىلەر سىيعا بەرىلدى. ال قوناققا كەلگەن وزگە كونفەسسيالاردىڭ وكىلدەرىنە پاسحا جۇمىرتقالارى سىيعا بەرىلدى. ءوز كەزەگىندە قوناقتار باۋىرساق اكەلدى.
اكسياعا قاتىسۋشىلاردىڭ ءبىرى اديا ءىلياس بىلاي دەپ ءوز ويىمەن ءبولىستى: «ءبىز ەلوردا تۇرعىندارى بۇل كۇنى عيباداتحاناعا ۇلتتىق تاعامدارىمىزدى تاراتۋعا، قالامىزدىڭ پراۆوسلاۆ تۇرعىندارىن قۇتتىقتاۋعا جانە قولداۋعا كەلدىك. ويتكەنى، سەنىم مەن ۇلتقا قاراماستان ءبىر-بىرىمىزدى قولداۋىمىز كەرەك».
ءىس-شارا ەلوردانىڭ ءتۇرلى ەتنوس وكىلدەرى اراسىنداعى ۇيلەسىمدىلىكتىڭ، بىرلىك پەن ءوزارا سىيلاستىقتىڭ ەرەكشە ۇلگىسىنە اينالدى.
