ءماجىلىس دەپۋتاتى اسحات ايماعامبەتوۆ دارى-دارمەك سالاسىنداعى تۇيتكىلدى ماسەلەلەردى كوتەرءدى،- دەپ حابارلايدى Dalanews.kz.
"راۋشان ەسىمدى ازامات. 42 جاستا. ونىڭ ءومىرى باياۋ ءسونىپ بارادى. ەم جوقتىعىنان ەمەس، ەمگە شيپا بولاتىن ءدارى ۇلتتىق دارىلىك فورمۋلياردا تىركەلمەگەندىكتەن، ءدارى جەتى جىلدان بەرى جاڭارتىلماعان ەمدەۋ حاتتاماسىنا ەنگىزىلمەگەندىكتەن، ءتىپتى ساتىپ الايىن دەسە دە، ەلدە رۇقسات ەتىلگەن تىزىمدە جوق. ونىڭ ءومىرى ءۇشىن كۇرەسى - بيۋروكراتيامەن كۇرەس. تاعى قانشاما وسىنداي راۋشان ءبىزدىڭ كومەگىمىزدى كۇتىپ وتىر؟" - دەپ اشىندى دەپۋتات.
ونىڭ سوزىنشە، سمايىلوۆ باستاعان جوعارعى اۋديتورلىق پالاتا جۇرگىزگەن ەسەپ - ەلىمىزدەگى فارماسيانىڭ شىنايى رەنتگەنى.
"رەنتگەن ناتيجەسى جاي عانا سىنىقتار مەن كولەڭكەلەردى كورسەتىپ قويماي، دەرەۋ شەشىمدى، جەدەل ەمدەۋدى تالاپ ەتەتىن تەرەڭ، ناعىز قاتەرلى ىسىكتەردى انىقتادى"، - دەدى ول.
ايماعامبەتوۆ ءۇش نەگىزگى ماسەلەنى كورسەتتى:
- دارى-دارمەككە قولجەتىمدىلىك.
"دارى-دارمەكتەر ءدارىحانالاردا ساتىلۋى ءۇشىن ولار ەڭ الدىمەن "ناسەلس-تە" ساراپتامادان، سوسىن تىركەۋدەن ءوتۋى كەرەك. اۋديت نە كورسەتتى؟ نورماتيۆ بويىنشا تىركەۋ مەرزىمى – 210 كۇن. الايدا بىرەۋلەر ءۇشىن بۇل مەرزىم زاڭسىز 1275 كۇنگە دەيىن سوزىلسا، ال وسى ۇيىمنىڭ بۇرىنعى قىزمەتكەرلەرى ءۇشىن وتە جىلدام، 25-اق كۇندە اياقتالىپ، ءراسىم وتكىزىلدى. 154 ءوتىنىم بويىنشا ساراپتاما پروسەدۋرالارىن بۇزۋ دەرەكتەرى انىقتالدى"، - دەدى ول.
- فارماكولوگيالىق باقىلاۋدى كۇشەيتۋ بويىنشا
"زاڭعا سايكەس "ناسەلس" دارىلەردىڭ جاعىمسىز رەاكسيالارى تۋرالى حابارلامالاردى جيناقتاپ، تالداپ، شارالار قابىلداۋ ءۇشىن جىبەرۋگە مىندەتتى. ءبىراق اۋديت كورسەتكەندەي، 28 "سارى كارتوچكاسى" بار ءدارى بويىنشا ەشقانداي شارا قابىلدانباعان. ونىڭ ۇستىنە دارلەردىڭ كەرى اسەرلەرى تۋرالى 137 اقپارات تۇسكەنىمەن، تەك 1 پرەپارات كەرى قايتارىلعان. ال جالپى فارماسيەۆتيكالىق باقىلاۋدان 77 ملن فارماسيەۆتيكالىق ءونىم تىس قالعان. بۇعان قوسا، دارىلەردى ءوندىرۋ ءۇشىن اكەلىنەتىن سۋبستانسيالار باقىلانبايدى ەكەن. كىم، نە اكەلىپ جاتىر؟ ولار قۇيۋعا دايىن دارىلەر مە، سۋبستانسيا ما؟ ولار قانشالىق ءقاۋىپسىز؟ بىلمەيمىز"، - دەدى ايماعامبەتوۆ.
- ەسكىرگەن ەمدەۋ حاتتامالارى بويىنشا.
"ءار ازاماتتى ەمدەگەندە دارىگەرلەر ارنايى ەمدەۋ حاتتاماسىندا كورسەتىلگەن دارىلەردى قولدانۋعا ءتيىس. ال ەمدەۋ حاتتامالار بولسا ۋاقتىلى جاڭارتىلمايدى. وزدەرىڭىز قاراڭىزدار: كلينيكالىق حاتتامالاردىڭ شامامەن 70%-ى (1133ء-تىڭ 785ء-ى) 5 جىلدان 12 جىلعا دەيىن قايتا قارالماعان. 10 جىل ەمەس، ءقازىر 1 جىل ىشىندە جاڭا دارىلەر پايدا بولادى. وسىعان بايلانىستى قازاقستاندىقتار جاڭا ادىستەرمەن ەم الا الماي ءجۇر دەپ ايتۋعا بولادى. حاتتامالاردى بەكىتۋ پروسەسىنىڭ ءوزى دە كۇردەلى"، - دەدى ول.
دەپۋتاتتىڭ ايتۋىنشا، تىركەۋ مەرزىمى وتكەن جانە تيىمدىلىگى تومەن 409 پرەپارات 3 جىل بويى فورمۋلياردان الىنباعان، ءتيىمسىز دەپ تانىلعان 5 پرەپارات 29 اۋرۋدى ەمدەۋ حاتتامالارىنان شىعارىلماعان. ال قاجەت دەلىنگەن 96 ءتيىمدى پرەپارات كەرسىنشە فورمۋليارعا ەنگىزىلمەگەن.
"مۇنداي اقىلعا سىيمايتىن جاعدايدىڭ سەبەبى – مينيسترلىكتىڭ بۇيرىقتارىنداعى قاراما-قايشىلىقتار. پرەپاراتتار ءتىپتى وريگينالدارىنان دا بىرنەشە ەسە جوعارى باعامەن ساتىپ الىنعان. دارىلەرگە قوسىلعان ۇستەمە باعا زاۋىتتاعى باعادان 172%-عا دەيىن كوپ، ال ەۋروپادا جانە الەمدە 30%-دان اسپايدى. ءبىر پرەپاراتتىڭ ءارتۇرلى ءدارىحانالارداعى باعاسى 3-5 ەسەگە دەيىن وزگەرەدى. ءتۇپنۇسقانىڭ باعاسى 344 تەڭگە بولسا، وتاندىق تاۋار ءوندىرۋشىنىڭ (ءوتو) باعاسى 1273 تەڭگە. بۇل 4 ەسەگە دەيىن قىمبات. ...پاراسەتامولدىڭ زاۋىتتاعى باعاسى 59 تەڭگە، قىرعىزستاندا 90، ال بىزدە 144 تەڭگەگە ساتىلىپ جاتىر. سالىستىرىڭىزدار. تەرافليۋگە ەلدە بەلگىلەگەن شەكتى باعا 3،3 مىڭ تەڭگە، ال زاۋىتتىق باعاسى 1،5 مىڭ تەڭگە. رەسەيدە ول 2،2 مىڭ، قىرعىزستاندا 2،5 مىڭ تەڭگە تۇرادى. ءتىپتى سۇمدىق جاعداي، ءدارىحانالاردا بيۋدجەت ەسەبىنەن ساتىپ الىنعان دارىلەر انىقتالدى"، - دەدى ول.
دەپۋتات ءبىر پرەپاراتتار قويمالاردا ءشىرىپ، ەسەپتەن شىعارىلىپ جاتقاندا، كەيبىر ومىرلىك ماڭىزى بار دارىلەر قولجەتىمسىز ەكەنىن، 45 مىڭ پاسيەنت ءدارىسىز قالعانىن، ال شىعىن كولەمى 3،7 ملرد تەڭگەدەن اساتىنىن مالىمدەدى.
"وتاندىق وندىرۋشىلەردى قولداۋعا ۇلكەن اقشا جۇمسالادى: ميللياردتاعان سۋبسيديالار، جەڭىلدىكپەن نەسيە بەرۋ، كەدەندىك پرەفەرەنسيالار، سالىقتان بوساتۋ. وعان قوسا – ۇزاق مەرزىمدىك تۇتىنۋ تۋرالى شارتتار. وسىنداي قولداۋ كورسەتە وتىرىپ، ءبىز قانداي پايدا كورىپ وتىرمىز؟ كوبىنە جاڭا پرەپاراتتى ءوندىرۋدىڭ ورنىنا جاي عانا ادەمى بوتەلكەلەرگە قۇيىلعان، شەتەلدەن اكەلىنگەن دارىلەر ەمەس پە؟ وعان قوسا بۇل ونىمدەردىڭ وتاندىق ەكونوميكا ۇلەسى دە از، قاعاز دا، شىنى دا كوبىنە سىرتتان كەلەدى دەگەن اقپارات بار. سوندا ميللياردتاردتاعان سۋبسيديالار مەن قولداۋىمىز جاساندى، يلليۋزيالىق وندىرىسكە كەتىپ جاتقان جوق پا؟" - دەگەن ساۋال جولدادى ول.
ول ەلدە دارى-دارمەك شىعارىلماي وتىرعانىن دا سىنادى.
"كەيىنگى ۋاقىتتا "قازۆاكتان" باسقا ەشتەڭە شىققان جوق دەۋگە بولادى. كلينيكالىق زەرتتەۋلەر وتە از. سوڭعى 10 جىلدا تەك 2 پرەپارات شىعارىلعان، ولاردىڭ ءبىرى - "يود جانە كاليي ءيوديدى". بۇنى ازىرلەۋگە 4،6 ملرد تەڭگە جۇمسالعان، ءبىراق ول ءتىپتى فورمۋليارعا دا ەنگىزىلمەگەن، ياعني قولدانىلمايدى"، - دەدى دەپۋتات.
