ماجىلىستەگى ۇكىمەت ساعاتىندا دەپۋتات باقىتجان بازاربەك اكىمدەردىڭ جۇمىس تيىمدىلىگىن ارتتىرۋ جانە وڭىرلەردىڭ ەكونوميكالىق ءوسىمىن كۇشەيتۋ ماقساتىندا ءبىرقاتار ۇسىنىس ايتتى. ول اكىمدەرگە سىناق مەرزىمىن ەنگىزۋدى، ينۆەستيسيالىق بەلسەندىلىك كارتاسىن جاساۋدى جانە ولاردىڭ جەتىستىكتەرىن قامتيتىن اشىق رەەستر ازىرلەۋدى ۇسىندى، دەپ حابارلايدى Dalanews.kz.

بازاربەكتىڭ ايتۋىنشا، قازىرگى ەكونوميكالىق جاعداي شۇعىل شارالاردى قاجەت ەتەدى.

"سالىق تۇسىمدەرى ازايىپ جاتىر، بۇل – ەسكەرتۋ بەلگىسى. 2024 جىلى سالىق تۇسىمدەرى 604 ميلليارد تەڭگەگە قىسقاردى. ءبىز ەۋرازيالىق ەكونوميكالىق وداققا مۇشە ەلدەر اراسىندا ءجىو وسىمىنە قاراماستان، كىرىس كولەمى ارتپاعان جالعىز مەملەكەت بولىپ وتىرمىز"، - دەدى دەپۋتات.

ول 2016 جىلى ەلدە ءتورت دونور ءوڭىر بولسا، بۇگىندە ولاردىڭ سانى ۇشەۋ عانا ەكەنىن ايتتى. الايدا سول ءۇش ءوڭىردىڭ جۇكتەمەسى 8،7%-عا، ياعني 37 ميلليارد تەڭگەگە ارتقان. ال قالعان وبلىستار ءوز كىرىسىن ادەيى تومەن كورسەتىپ، 2،3 تريلليون تەڭگەنى قۇرايتىن سۋبۆەنسياعا تاۋەلدى بولىپ وتىر.

دەپۋتات اكىمدەردى ينۆەستيسيا تارتۋ، جەمقورلىقپەن كۇرەس جانە يننوۆاسيا ەنگىزۋ باعىتىندا ءالسىز جۇمىس ىستەپ جاتىر دەپ سىنادى.

"نەلىكتەن رەسپۋبليكالىق بيۋدجەتتىڭ كىرىسى وسپەي، كەرىسىنشە وڭىرلەردەن الىناتىن قاراجات كولەمى ارتىپ جاتىر؟ دەمەك، اكىمدەر ينۆەستيسيا مەن بيزنەسكە قولايلى جاعداي جاساي الماي وتىر. جەمقورلىقپەن كۇرەستى دە، جاڭاشىلدىقتى ەنگىزۋدى دە جەتكىلىكتى دەڭگەيدە جۇرگىزبەيدى"، - دەدى ول.

وسى ماسەلەلەردى شەشۋ ءۇشىن بازاربەك ءۇش ناقتى ۇسىنىس ايتتى. بىرىنشىدەن، وبلىس جانە رەسپۋبليكالىق ماڭىزى بار قالا اكىمدەرىنە ەكى جىلدىق سىناق مەرزىمىن ەنگىزۋ كەرەك. بۇل كەزەڭدە ولاردىڭ جۇمىسى ناقتى ماكروەكونوميكالىق كورسەتكىشتەرمەن باعالانادى: ءوڭىر تابىسىنىڭ دەڭگەيى، سالىق جيناۋ كورسەتكىشى، يندۋستريالىق جاڭالىقتار ەنگىزۋ، ستارتاپتاردى دامىتۋ، ەكونوميكالىق ءوسىم رەيتينگى، ينۆەستيسيالىق تارتىمدىلىق، تارتىلعان ينۆەستورلار سانى، اشىلعان جۇمىس ورىندارى مەن ىسكە قوسىلعان ءوندىرىس ورىندارى.

"ەگەر ناتيجە بولماسا، اكىم تيىمسىزدىگى ءۇشىن قىزمەتتەن كەتۋى ءتيىس"، - دەدى دەپۋتات.

ەكىنشىدەن، وڭىرلەردەگى ينۆەستيسيالىق جانە يننوۆاسيالىق بەلسەندىلىكتى كورسەتەتىن اشىق كارتا ازىرلەۋ ۇسىنىلدى. بۇل كارتا ازاماتتارعا قولجەتىمدى بولۋى جانە اكىمدەردىڭ جۇمىسىنا باعا بەرۋدىڭ ءبىر قۇرالىنا اينالۋى ءتيىس. ۇشىنشىدەن، اكىمدەردىڭ ينۆەستيسيالىق، يننوۆاسيالىق جانە يندۋستريالىق بەلسەندىلىگىن كورسەتەتىن اشىق رەەستر ازىرلەۋ قاجەت.

دەپۋتاتتىڭ پىكىرىنشە، تەك وسىنداي ناقتى ءارى اشىق تەتىكتەر ارقىلى عانا قازاقستان ەكونوميكاسىنداعى جاعدايدى تۇزەتۋگە بولادى.