Májilistegi Úkimet saǵatynda depýtat Baqytjan Bazarbek ákimderdiń jumys tiimdiligin arttyrý jáne óńirlerdiń ekonomikalyq ósimin kúsheitý maqsatynda birqatar usynys aitty. Ol ákimderge synaq merzimin engizýdi, investitsiialyq belsendilik kartasyn jasaýdy jáne olardyń jetistikterin qamtityn ashyq reestr ázirleýdi usyndy, dep habarlaidy Dalanews.kz.
Bazarbektiń aitýynsha, qazirgi ekonomikalyq jaǵdai shuǵyl sharalardy qajet etedi.
"Salyq túsimderi azaiyp jatyr, bul – eskertý belgisi. 2024 jyly salyq túsimderi 604 milliard teńgege qysqardy. Biz Eýraziialyq ekonomikalyq odaqqa múshe elder arasynda JIÓ ósimine qaramastan, kiris kólemi artpaǵan jalǵyz memleket bolyp otyrmyz", - dedi depýtat.
Ol 2016 jyly elde tórt donor óńir bolsa, búginde olardyń sany úsheý ǵana ekenin aitty. Alaida sol úsh óńirdiń júktemesi 8,7%-ǵa, iaǵni 37 milliard teńgege artqan. Al qalǵan oblystar óz kirisin ádeii tómen kórsetip, 2,3 trillion teńgeni quraityn sýbventsiiaǵa táýeldi bolyp otyr.
Depýtat ákimderdi investitsiia tartý, jemqorlyqpen kúres jáne innovatsiia engizý baǵytynda álsiz jumys istep jatyr dep synady.
"Nelikten respýblikalyq biýdjettiń kirisi óspei, kerisinshe óńirlerden alynatyn qarajat kólemi artyp jatyr? Demek, ákimder investitsiia men bizneske qolaily jaǵdai jasai almai otyr. Jemqorlyqpen kúresti de, jańashyldyqty engizýdi de jetkilikti deńgeide júrgizbeidi", - dedi ol.
Osy máselelerdi sheshý úshin Bazarbek úsh naqty usynys aitty. Birinshiden, oblys jáne respýblikalyq mańyzy bar qala ákimderine eki jyldyq synaq merzimin engizý kerek. Bul kezeńde olardyń jumysy naqty makroekonomikalyq kórsetkishtermen baǵalanady: óńir tabysynyń deńgeii, salyq jinaý kórsetkishi, indýstriialyq jańalyqtar engizý, startaptardy damytý, ekonomikalyq ósim reitingi, investitsiialyq tartymdylyq, tartylǵan investorlar sany, ashylǵan jumys oryndary men iske qosylǵan óndiris oryndary.
"Eger nátije bolmasa, ákim tiimsizdigi úshin qyzmetten ketýi tiis", - dedi depýtat.
Ekinshiden, óńirlerdegi investitsiialyq jáne innovatsiialyq belsendilikti kórsetetin ashyq karta ázirleý usynyldy. Bul karta azamattarǵa qoljetimdi bolýy jáne ákimderdiń jumysyna baǵa berýdiń bir quralyna ainalýy tiis. Úshinshiden, ákimderdiń investitsiialyq, innovatsiialyq jáne indýstriialyq belsendiligin kórsetetin ashyq reestr ázirleý qajet.
Depýtattyń pikirinshe, tek osyndai naqty ári ashyq tetikter arqyly ǵana Qazaqstan ekonomikasyndaǵy jaǵdaidy túzetýge bolady.
