تۇركىستان وبلىسى، ورداباسى اۋدانىنداعى كوكارال اۋىلىنىڭ تۇرعىندارى تابيعي گازعا قوسىلدى. ايماق باسشىسى دارحان ساتىبالدى تۇرعىنداردىڭ قۋانىشىن بولىسۋگە تورتكۇل اۋىل وكرۋگىنە قاراستى كوكارال اۋىلىنا ارنايى بارىپ، تابيعي گاز بەرۋ راسىمىنە قاتىستى،  دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ. 

تۇرعىنداردى ايتۋلى ساتپەن قۇتتىقتاپ، اۋىلدى كوركەيتۋگە ۇلەس قوسۋعا شاقىردى. اۋىلداردى جانداندىرىپ، جەرگىلىكتى حالىقتىڭ جاقسى ءومىر سۇرۋىنە قولايلى جاعداي جاساۋ باعىتىنداعى ىستەر مەملەكەت باسشىسى قاسىم-جومارت توقايەۆتىڭ باستاماسىمەن جۇزەگە اسىپ جاتقانىن تىلگە تيەك ەتتى. اۋىل اقساقالدارى ينفراقۇرىلىمدى جاقسارتىپ، تۇرعىندارعا «كوگىلدىر وتىن» يگىلىگىن تارتۋ ەتكەن مەملەكەتكە، ءوڭىر باسشىسىنا العىسىن جەتكىزدى.

ەندى اۋىلداعى 120-عا جۋىق ابونەنت ورتالىقتاندىرىلعان تابيعي گازعا قوسىلىپ، 730-عا جۋىق تۇرعىن «كوگىلدىر وتىننىڭ» راحاتىن كورەدى. گازداندىرۋ جۇمىسى كەزەڭ-كەزەڭىمەن جالعاسپاق.

ورداباسى اۋداندىق «تۇرعىن ءۇي كوممۋنالدىق شارۋاشىلىق، جولاۋشىلار كولىگى، اۆتوموبيل جولدارى جانە تۇرعىن ءۇي ينسپەكسياسى ءبولىمى» مم تاپسىرىسىمەن جۇزەگە اسىرىلعان جوبانىڭ قۇنى – 140،3 ملن تەڭگە. قۇرىلىس جۇمىستارىن «موناليت ديزاين-2030» ج ش س 2021 جىلى باستاپ، بيىل پايدالانۋعا تاپسىرىپ وتىر. جالپى قۇبىر ۇزىندىعى – 8،1 شاقىرىم.

ايتا كەتەيىك، تۇركىستان وبلىسىندا بىلتىر 111 مىڭنان استام حالىق گازبەن قامتىلدى. بۇل ەلىمىزدەگى ەڭ جوعارى كورسەتكىش. ياعني گازبەن قامتىلعان ءاربىر 3ء-شى اۋىل تۇركىستان وڭىرىندە ورنالاسقان. تابيعي گازبەن 510 ەلدى مەكەن قامتىلىپ، جالپى قامتۋ دەڭگەيى 63% قۇرايدى (1،7 ملن. ادام نەمەسە 81،6%). ەكى جىلدا 91 ەلدى مەكەن (2023 جىلى – 44، 2024 جىلى – 47) تابيعي گازعا قوسىلدى. جۇيەلى جۇمىستاردىڭ ناتيجەسىندە، جىل قورىتىندىسىمەن گازبەن قامتىلعان ەلدى مەكەندەردىڭ جالپى سانى 557-گە ارتىپ، قامتۋ دەڭگەيى 69%-عا جەتەتىن بولادى (1،8 ملن. ادام نەمەسە 84،9%).