الماتىدا XVII حالىقارالىق «ەۋرازيا» كينوفەستيۆالىنىڭ سالتاناتتى اشىلۋى ءوتتى. ءىس-شاراعا وراي قازاقستان پرەزيدەنتى قاسىم-جومارت توقايەۆ ارنايى قۇتتىقتاۋ حاتىن جولدادى.

مەملەكەت باسشىسىنىڭ قۇتتىقتاۋىن ق ر مادەنيەت جانە اقپارات ءمينيسترى ايدا بالايەۆا وقىپ بەردى.

«بۇل – ءتول مادەنيەتىمىزدى كۇللى الەمگە تانىتاتىن بىرەگەي جوبا. بيىلعى بايقاۋ قازاق كينوسىنىڭ كوريفەيى شاكەن ايمانوۆتىڭ تۋعانىنا 110 جىل جانە «قازاقفيلم» كينوستۋدياسىنىڭ قۇرىلعانىنا 90 جىل تولۋىمەن تۇسپا-تۇس كەلىپ وتىر. مۇنىڭ سيمۆولدىق ءمانى زور.

كينو ونەرى جۇرتشىلىقتى جاسامپازدىق پەن جاڭاشىلدىققا شاقىرادى، جالپى ادامزاتقا ورتاق قۇندىلىقتاردى دارىپتەپ، ۇلت ساپاسىن جاقسارتۋعا ىقپال ەتەدى. سونداي-اق ءتۇرلى حالىقتىڭ مادەني بايلانىسىن نىعايتادى»، – دەلىنگەن قۇتتىقتاۋ حاتتا.

مەملەكەت باسشىسى ەلىمىزدە ۇلتتىق كينەماتوگرافيانى قولداۋعا باسا ءمان بەرىلىپ وتىرعانىن دا اتاپ ءوتتى.

«وسى سالانى دامىتۋ ءۇشىن قازاقستاندا اۋقىمدى جۇمىس اتقارىلىپ جاتىر. ماماندارىمىز مازمۇندى ءارى ماعىنالى كارتينالار ءتۇسىرىپ، اعا بۋىننىڭ سارا جولىن لايىقتى جالعاستىرىپ كەلەدى. فيلمدەرىمىز بەدەلدى بايقاۋلاردا جۇلدە الىپ ءجۇر. «ەۋرازيا» حالىقارالىق كينوفەستيۆالى شىن جۇيرىكتەردى انىقتاپ، ەڭ ۇزدىك جوبالارعا جول اشادى دەپ سەنەمىن. كورەرمەنگە وي سالىپ، رۋحاني ازىق بولاتىن تۋىندىلارىڭىز كوپ بولسىن!» – دەدى پرەزيدەنت.

ءوز كەزەگىندە ايدا بالايەۆا «ەۋرازيا» كينوفەستيۆالىنىڭ قازاقستان مەن بۇكىل ورتالىق ازيانىڭ مادەني برەندىنە اينالعان بىرەگەي فورۋم ەكەنىن اتاپ ءوتىپ، وتاندىق كينو سالاسىن جۇيەلى تۇردە دامىتۋ، زاڭنامالىق بازانى ودان ءارى جەتىلدىرۋ بويىنشا جۇمىستار جالعاساتىنىن ايتتى.

حالىقارالىق «ەۋرازيا» كينوفەستيۆالى 24-30 قاراشا ارالىعىندا وتەدى. فەستيۆالگە 15-تەن استام ەل قاتىسىپ جاتىر.

اۋقىمدى شارانى ق ر مادەنيەت جانە اقپارات مينيسترلىگى مەن شاكەن ايمانوۆ اتىنداعى «قازاقفيلم» ۇلتتىق كينوستۋدياسى ۇيىمداستىرعان.
ايتا كەتەيىك، بيىل كونكۋرس باعدارلاماسىندا ءۇش قۇرلىقتان كەلگەن 12 فيلم ۇسىنىلادى.

كونكۋرس بانگلادەش پەن وڭتۇستىك كورەيادان باستاپ، اۆستريا مەن كاتارعا دەيىنگى ەلدەردىڭ تۋىندىلارىن قامتيدى. ەۋروپا، ازيا جانە تاياۋ شىعىستان كەلگەن شىعارماشىلىق توپتار امبەباپ تاقىرىپتار مەن جەرگىلىكتى كونتەكستتى بىرىكتىرەتىن جۇمىستاردى ۇسىنباق.

ق ر مادەنيەت جانە اقپارات مينيسترلىگىنىڭ باسپا ءسوز قىزمەتى