Almatyda XVII Halyqaralyq «Eýraziia» kinofestivaliniń saltanatty ashylýy ótti. Is-sharaǵa orai Qazaqstan Prezidenti Qasym-Jomart Toqaev arnaiy quttyqtaý hatyn joldady.
Memleket basshysynyń quttyqtaýyn QR Mádeniet jáne aqparat ministri Aida Balaeva oqyp berdi.
«Bul – tól mádenietimizdi kúlli álemge tanytatyn biregei joba. Biylǵy baiqaý qazaq kinosynyń korifeii Sháken Aimanovtyń týǵanyna 110 jyl jáne «Qazaqfilm» kinostýdiiasynyń qurylǵanyna 90 jyl tolýymen tuspa-tus kelip otyr. Munyń simvoldyq máni zor.
Kino óneri jurtshylyqty jasampazdyq pen jańashyldyqqa shaqyrady, jalpy adamzatqa ortaq qundylyqtardy dáriptep, ult sapasyn jaqsartýǵa yqpal etedi. Sondai-aq túrli halyqtyń mádeni bailanysyn nyǵaitady», – delingen quttyqtaý hatta.
Memleket basshysy elimizde ulttyq kinematografiiany qoldaýǵa basa mán berilip otyrǵanyn da atap ótti.
«Osy salany damytý úshin Qazaqstanda aýqymdy jumys atqarylyp jatyr. Mamandarymyz mazmundy ári maǵynaly kartinalar túsirip, aǵa býynnyń sara jolyn laiyqty jalǵastyryp keledi. Filmderimiz bedeldi baiqaýlarda júlde alyp júr. «Eýraziia» halyqaralyq kinofestivali shyn júirikterdi anyqtap, eń úzdik jobalarǵa jol ashady dep senemin. Kórermenge oi salyp, rýhani azyq bolatyn týyndylaryńyz kóp bolsyn!» – dedi Prezident.
Óz kezeginde Aida Balaeva «Eýraziia» kinofestivaliniń Qazaqstan men búkil Ortalyq Aziianyń mádeni brendine ainalǵan biregei forým ekenin atap ótip, otandyq kino salasyn júieli túrde damytý, zańnamalyq bazany odan ári jetildirý boiynsha jumystar jalǵasatynyn aitty.
Halyqaralyq «Eýraziia» kinofestivali 24-30 qarasha aralyǵynda ótedi. Festivalge 15-ten astam el qatysyp jatyr.
Aýqymdy sharany QR Mádeniet jáne aqparat ministrligi men Sháken Aimanov atyndaǵy «Qazaqfilm» ulttyq kinostýdiiasy uiymdastyrǵan.
Aita keteiik, biyl konkýrs baǵdarlamasynda úsh qurlyqtan kelgen 12 film usynylady.
Konkýrs Bangladesh pen Ońtústik Koreiadan bastap, Avstriia men Katarǵa deiingi elderdiń týyndylaryn qamtidy. Eýropa, Aziia jáne Taiaý Shyǵystan kelgen shyǵarmashylyq toptar ámbebap taqyryptar men jergilikti kontekstti biriktiretin jumystardy usynbaq.
QR Mádeniet jáne aqparat ministrliginiń baspasóz qyzmeti
