ەسىرتكى تاراتۋعا قاتىسقان لاۋازىمدى تۇلعالاردى ءومىر بويى باس بوستاندىعىنان ايىرۋ ۇسىنىلدى. بۇل تۋرالى ءماجىلىس دەپۋتاتى اسحات ايماعامبەتوۆ الەۋمەتتىك جەلىدە جازدى، دەپ حابارلايدى Dalanews.kz.
"ماجىلىستە ەسىرتكى وندىرۋشىلەرىنە جازانى كۇشەيتۋگە باعىتتالعان ماڭىزدى زاڭ جوباسى تالقىلانۋدا. جازانى ءومىر بويىنا باس بوستاندىعىنان ايىرۋعا دەيىن قاتايتۋ ۇسىنىلدى. بۇل – ادىلەتتى شەشىم. دەپۋتاتتار وسى نورمانى قولداپ داۋىس بەردى"، دەپ جازدى 23 قاراشادا دەپۋتات اسحات ايماعامبەتوۆ Telegram ارنادا.
الايدا، ول بۇل ارادا بۇدان دا كۇردەلى ماسەلە بارىن ايتادى: قىلمىسپەن كۇرەسۋى ءتيىس ازاماتتار وزدەرى ەسىرتكى بيزنەسىنە ارالاسقان كەزدە نە بولادى؟
"ءبىز قۇقىق قورعاۋ ورگاندارىنىڭ قىزمەتكەرلەرى مەن وزدەرىنىڭ لاۋازىمىن، قىزمەتتىك مۇمكىندىكتەرىن جانە اقپاراتقا قولجەتىمدىلىكتى پايدالانىپ، ەسىرتكى اينالىمىنا قاتىسقان وزگە دە لاۋازىمدى تۇلعالارعا ءومىر بويىنا باس بوستاندىعىنان ايىرۋ جازاسىن ەنگىزۋ تۋرالى ۇسىنىس جاسادىق. ەگەر ولاردىڭ كىناسى دالەلدەنسە، مۇنداي ارەكەتتەر ەڭ قاتاڭ جازالانۋى ءتيىس. سەبەبى بۇل – ازاماتتاردىڭ مۇددەسىنە جاسالعان ساتقىندىق، قوعام سەنىمىنە نۇقسان كەلتىرىپ، ەلدىڭ قاۋىپسىزدىگىنە قاتەر توندىرەدى"، - دەيدى ول.
ول قوعام ءۇشىن ۇلكەن ءقاۋىپ ءتوندىرىپ وتىرعان وسى ماسەلەنى جويۋعا باعىتتالعان ەسىرتكىگە تاۋەلدىلىكپەن كۇرەس جونىندەگى كەشەندى جوسپار بەكىتىلگەنىن، سونىمەن قاتار، ۇلتتىق قاۋىپسىزدىكتى نىعايتاتىن قوسىمشا شارالار دا قابىلدانعانىن دا ناقتىلايدى.
ايماعامبەتوۆ ايتىپ وتىرعان جايتتار ەلىمىزدە اراكىدىك كەزدەسەدى. ماسەلەن، 2024 جىلى 15 قاراشادا جامبىل وبلىسىندا ەسىرتكى بيزنەسى ءىسى بويىنشا پوليسيا مايورىنا قاتىستى سوت وتىرىسى بولدى. سوتتا ونىڭ اشىلعان قىلمىس كولەمىن ارتتىرۋ ءۇشىن ەسىرتكى ساتقانى انىقتالدى. سوت ۇكىمىمەن ول 11 جىلعا باس بوستاندىعىنان ايىرىلدى.
