Esirtki taratýǵa qatysqan laýazymdy tulǵalardy ómir boiy bas bostandyǵynan aiyrý usynyldy. Bul týraly Májilis depýtaty Ashat Aimaǵambetov áleýmettik jelide jazdy, dep habarlaidy Dalanews.kz.
"Májiliste esirtki óndirýshilerine jazany kúsheitýge baǵyttalǵan mańyzdy zań jobasy talqylanýda. Jazany ómir boiyna bas bostandyǵynan aiyrýǵa deiin qataitý usynyldy. Bul – ádiletti sheshim. Depýtattar osy normany qoldap daýys berdi", dep jazdy 23 qarashada depýtat Ashat Aimaǵambetov Telegram arnada.
Alaida, ol bul arada budan da kúrdeli másele baryn aitady: qylmyspen kúresýi tiis azamattar ózderi esirtki biznesine aralasqan kezde ne bolady?
"Biz quqyq qorǵaý organdarynyń qyzmetkerleri men ózderiniń laýazymyn, qyzmettik múmkindikterin jáne aqparatqa qoljetimdilikti paidalanyp, esirtki ainalymyna qatysqan ózge de laýazymdy tulǵalarǵa ómir boiyna bas bostandyǵynan aiyrý jazasyn engizý týraly usynys jasadyq. Eger olardyń kinási dáleldense, mundai áreketter eń qatań jazalanýy tiis. Sebebi bul – azamattardyń múddesine jasalǵan satqyndyq, qoǵam senimine nuqsan keltirip, eldiń qaýipsizdigine qater tóndiredi", - deidi ol.
Ol qoǵam úshin úlken qaýip tóndirip otyrǵan osy máseleni joiýǵa baǵyttalǵan esirtkige táýeldilikpen kúres jónindegi keshendi jospar bekitilgenin, sonymen qatar, ulttyq qaýipsizdikti nyǵaitatyn qosymsha sharalar da qabyldanǵanyn da naqtylaidy.
Aimaǵambetov aityp otyrǵan jaittar elimizde arakidik kezdesedi. Máselen, 2024 jyly 15 qarashada Jambyl oblysynda esirtki biznesi isi boiynsha politsiia maioryna qatysty sot otyrysy boldy. Sotta onyń ashylǵan qylmys kólemin arttyrý úshin esirtki satqany anyqtaldy. Sot úkimimen ol 11 jylǵa bas bostandyǵynan aiyryldy.
