وڭتۇستىك وڭىرلەردەگى سۋ قويمالارىنىڭ تولىمى بىلتىرعى كورسەتكىشتەن شامامەن 2 ملرد تەكشە مەترگە تومەن، دەپ حابارلايدى Dalanews.kz.
بۇل تۋرالى ۇكىمەت وتىرىسىندا سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ مالىمدەدى. ونىڭ ايتۋىنشا، سىرداريا وزەنىنىڭ جوعارعى اعىسىندا، كورشىلەس ەلدەر اۋماعىندا ورنالاسقان سۋ قويمالارىنداعى سۋ كولەمى وتكەن جىلدىڭ وسى كەزەڭىمەن سالىستىرعاندا 3،2 ملرد تەكشە مەترگە ازايعان. ال قازاقستاننىڭ وڭتۇستىك ايماقتارىنداعى قويمالاردا سۋ 1،9 ملرد تەكشە مەترگە كەم.
مينيستر مۇنداي جاعداي كۇز-قىس مەزگىلىندە جاۋىن-شاشىننىڭ از ءتۇسۋى، مۇزدىق اعىسىنىڭ قىسقارۋى جانە كليماتتىڭ وزگەرۋىمەن بايلانىستى ەكەنىن ايتتى.
«بۇل – ۇزاق مەرزىمدى سيپاتقا يە وبەكتيۆتى شىندىق. سوندىقتان ءبىز جۇيەلى بەيىمدەلۋگە كوشۋىمىز كەرەك. مينيسترلىك 2026 جىلعى سۋارۋ ماۋسىمىنا دايىندىقتى باستاپ كەتتى. اقپان ايىندا ەڭ پەسسيميستىك سەناريي بويىنشا سۋ پايدالانۋ ليميتتەرى ناقتىلانادى، ال ناۋرىزدا اۋىل شارۋاشىلىعى مينيسترلىگى ەگىس قۇرىلىمىن قايتا قارايدى»، – دەدى نۇرجىگىتوۆ.
سونداي-اق مينيسترلىك ديقانداردى سۋدى كوپ قاجەت ەتپەيتىن داقىلدارعا كوشۋگە شاقىردى.
ەسكە سالايىق، بىلتىر جەلتوقساندا پرەمەر-مينيستردىڭ ورىنباسارى قانات بوزىمبايەۆ الداعى ۆەگەتاسيالىق ماۋسىمدا وڭتۇستىك وڭىرلەردە سۋ تاپشىلىعى 1 ملرد تەكشە مەترگە دەيىن جەتۋى مۇمكىن ەكەنىن ايتقان ەدى.
