قازاقستاندا جەكە تۇلعالارعا ارنالعان اۆتوليزينگ باعدارلاماسى كوپشىلىك كۇتكەندەي ناتيجە بەرمەدى. جەلتوقساندا كەڭىنەن تانىستىرىلىپ، ىسكە قوسىلعان جوبا قازاقستاندىقتار اراسىندا سۇرانىسقا يە بولا المادى. بۇل تۋرالى اۆتوساراپشىلار "31 ارناعا" بەرگەن پىكىرىندە مالىمدەدى، دەپ حابارلايدى Dalanews.kz.
مامانداردىڭ ايتۋىنشا، اۆتوليزينگتىڭ حالىق سۇرانىسىنا يە بولماۋىنىڭ باستى سەبەبى - ونىڭ قىمبات ەكەنى. بۇل قىزمەت كوپشىلىك ءۇشىن قولجەتىمسىز بولىپ وتىر. باعدارلاما ىسكە قوسىلعالى بەرى نەبارى ءبىر عانا مامىلە جاسالعان، ال بانكتەردىڭ باسىم بولىگى ونى تولىققاندى ەنگىزۋگە اسىقپاعان.
اۆتوساراپشى الەكسەي الەكسەيەۆتىڭ پىكىرىنشە، ۇسىنىلىپ وتىرعان ليزينگ شىن مانىندە اۆتونەسيەنىڭ بالاماسى عانا. ال مۇنداي ونىمگە قىزىعۋشىلىق تەك ول ءداستۇرلى نەسيەگە قاراعاندا ءتيىمدى بولعان جاعدايدا پايدا بولادى.
"كولىكتىڭ يەسى بولماي، ونى ليزينگكە الۋدىڭ نە قاجەتى بار؟ ونىڭ ۇستىنە شارتتارى ءتيىمسىز بولسا. باتىس ەلدەرىندە ادام كولىكتى 2-3 جىلعا ليزينگكە الادى دا، امورتيزاسيا قۇنىن عانا تولەيدى"، - دەيدى الەكسەي الەكسەيەۆ.
الەمدىك تاجىريبەدە اۆتوكونسەرندەر وزدەرىنىڭ ليزينگ كومپانيالارىن قۇرادى. ال قازاقستاندا بۇل ىسكە بانكتەردىڭ ارالاسۋى قىزمەت قۇنىن ودان ءارى ءوسىرىپ وتىر.
"بانك ارالاسقان ساتتەن باستاپ بازالىق مولشەرلەمە، پايىزدار، قىزمەت كورسەتۋ اقىسى قوسىلادى دا، بۇل مۇلدە ءتيىمسىز سحەماعا اينالادى. مۇنداي ءونىم ەشكىمگە قاجەت ەمەس، سوندىقتان ونى ەشكىم پايدالانبايدى"، - دەيدى ساراپشى.
سونىمەن قاتار، ماماندار باعدارلامانىڭ بولاشاعىنا ءبىرجاقتى باعا بەرۋگە ءالى ەرتە ەكەنىن ايتادى. ويتكەنى اۆتوليزينگ - نارىق ءۇشىن جاڭا ءونىم، ول زاڭنامالىق تۇرعىدا ءالى دە پىسىقتاۋدى قاجەت ەتەدى.
تاعى ءبىر ساراپشى ارسەن شاكۋوۆ باعا ساياساتى ناقتى ءارى تۇسىنىكتى بولۋعا ءتيىس دەپ ەسەپتەيدى.
"باعاسى، شارتتارى ناقتى بەكىتىلۋى كەرەك. تاريف ءبىرىڭعاي بولسا، ءار بانكتە ءارتۇرلى پايىز بولمايدى. سوندا ادامداردىڭ تاڭداۋى ايقىن بولادى: كولىكتى قىمباتىراق نەسيەگە الۋ نەمەسە ارزانىراق ليزينگكە راسىمدەۋ"، - دەيدى ول.
