Qazaqstanda jeke tulǵalarǵa arnalǵan avtolizing baǵdarlamasy kópshilik kútkendei nátije bermedi. Jeltoqsanda keńinen tanystyrylyp, iske qosylǵan joba qazaqstandyqtar arasynda suranysqa ie bola almady. Bul týraly avtosarapshylar "31 arnaǵa" bergen pikirinde málimdedi, dep habarlaidy Dalanews.kz.
Mamandardyń aitýynsha, avtolizingtiń halyq suranysyna ie bolmaýynyń basty sebebi - onyń qymbat ekeni. Bul qyzmet kópshilik úshin qoljetimsiz bolyp otyr. Baǵdarlama iske qosylǵaly beri nebári bir ǵana mámile jasalǵan, al bankterdiń basym bóligi ony tolyqqandy engizýge asyqpaǵan.
Avtosarapshy Aleksei Alekseevtiń pikirinshe, usynylyp otyrǵan lizing shyn máninde avtonesieniń balamasy ǵana. Al mundai ónimge qyzyǵýshylyq tek ol dástúrli nesiege qaraǵanda tiimdi bolǵan jaǵdaida paida bolady.
"Kóliktiń iesi bolmai, ony lizingke alýdyń ne qajeti bar? Onyń ústine sharttary tiimsiz bolsa. Batys elderinde adam kólikti 2-3 jylǵa lizingke alady da, amortizatsiia qunyn ǵana tóleidi", - deidi Aleksei Alekseev.
Álemdik tájiribede avtokontsernder ózderiniń lizing kompaniialaryn qurady. Al Qazaqstanda bul iske bankterdiń aralasýy qyzmet qunyn odan ári ósirip otyr.
"Bank aralasqan sátten bastap bazalyq mólsherleme, paiyzdar, qyzmet kórsetý aqysy qosylady da, bul múlde tiimsiz shemaǵa ainalady. Mundai ónim eshkimge qajet emes, sondyqtan ony eshkim paidalanbaidy", - deidi sarapshy.
Sonymen qatar, mamandar baǵdarlamanyń bolashaǵyna birjaqty baǵa berýge áli erte ekenin aitady. Óitkeni avtolizing - naryq úshin jańa ónim, ol zańnamalyq turǵyda áli de pysyqtaýdy qajet etedi.
Taǵy bir sarapshy Arsen Shakýov baǵa saiasaty naqty ári túsinikti bolýǵa tiis dep esepteidi.
"Baǵasy, sharttary naqty bekitilýi kerek. Tarif biryńǵai bolsa, ár bankte ártúrli paiyz bolmaidy. Sonda adamdardyń tańdaýy aiqyn bolady: kólikti qymbatyraq nesiege alý nemese arzanyraq lizingke rásimdeý", - deidi ol.
