تۇركىستان وبلىسى ورداباسى اۋدانىنا قاراستى شۇبارسۋ اۋىلىندا قايعىلى وقيعا بولدى. ءبىر ۇيدە تۇراتىن جالعىزباستى انا مەن ونىڭ ەكى كامەلەتكە تولماعان ۇلى كومىر تۇتىنىنەن ۋلانىپ، كوز جۇمدى، دەپ حابارلايدى Dalanews.kz ينفورمبيۋرو31-گە سىلتەمە جاساپ.
الدىن الا مالىمەت بويىنشا، 37 جاستاعى ايەل ءتۇنى بويى پەش جاققان. تاڭەرتەڭ ول جانە 4، 7 جاستاعى ەكى ۇلى ويانباي قالعان. ال مەكتەپتە وقيتىن ۇلكەن بالاسى ءتىرى قالىپ، دارىگەرلەردىڭ كومەگىمەن امان قالعان. ءقازىر ول امبۋلاتوريالىق ەمگە جىبەرىلدى.
مارقۇمداردىڭ دەنەسىن قۇتقارۋشىلار ءۇي ىشىنەن الىپ شىققان. ايەلدى ىزدەگەن ارىپتەستەرى كورشىلەرىنە حابار بەرىپ، سودان كەيىن عانا ءۇيدىڭ ەسىگى اشىلعان. الايدا ىشكە كىرگەن كەزدە تىم كەش بولعان.
كورشىلەرىنىڭ ايتۋىنشا، ءۇيدىڭ ءىشى كوك تۇتىنگە تولىپ كەتكەن. ەسىكتى اشقان ساتتە ءتۇتىن سىرتقا شىعىپ، سول كەزدە عانا ءتىرى قالعان بالا ەسىككە ەڭبەكتەپ جەتىپ، ەسىنەن تانىپ قالا جازداعان. جەدەل جاردەم ونى بىردەن اۋرۋحاناعا الىپ كەتكەن.
جەرگىلىكتى تۇرعىندار مارقۇم ايەلدىڭ بىرنەشە جىل بۇرىن جولداسىنان اجىراسىپ، وسى اۋىلعا كوشىپ كەلگەنىن ايتادى. ول وسى ءۇيدى جالداپ تۇرىپ، بالاباقشادا تاربيەشى بولىپ جۇمىس ىستەگەن. كورشىلەرىنىڭ سوزىنشە، پەشتىڭ اقاۋلى ەكەنى بىرنەشە رەت ءۇي يەسىنە ەسكەرتىلگەن، ءبىراق ءتيىستى شارا قابىلدانباعان.
قايعىلى وقيعادان ءبىر عانا بالا امان قالدى، ول مارقۇمنىڭ جەتىنشى سىنىپتا وقيتىن ۇلى. ءقازىر ونىڭ جاعدايى جاقسى، ەندى ونى اكەسى الىپ كەتپەك.
وبلىستىق توتەنشە جاعدايلار دەپارتامەنتىنىڭ حابارلاۋىنشا، وقيعاعا ءۇي مۇرجاسىنىڭ تازالانباۋى سەبەپ بولۋى مۇمكىن. ءقازىر تەرگەۋ جۇرگىزىلىپ جاتىر.
