Túrkistan oblysy Ordabasy aýdanyna qarasty Shubarsý aýylynda qaiǵyly oqiǵa boldy. Bir úide turatyn jalǵyzbasty ana men onyń eki kámeletke tolmaǵan uly kómir tútininen ýlanyp, kóz jumdy, dep habarlaidy Dalanews.kz Informbiýro31-ge silteme jasap.
Aldyn ala málimet boiynsha, 37 jastaǵy áiel túni boiy pesh jaqqan. Tańerteń ol jáne 4, 7 jastaǵy eki uly oianbai qalǵan. Al mektepte oqityn úlken balasy tiri qalyp, dárigerlerdiń kómegimen aman qalǵan. Qazir ol ambýlatoriialyq emge jiberildi.
Marqumdardyń denesin qutqarýshylar úi ishinen alyp shyqqan. Áieldi izdegen áriptesteri kórshilerine habar berip, sodan keiin ǵana úidiń esigi ashylǵan. Alaida ishke kirgen kezde tym kesh bolǵan.
Kórshileriniń aitýynsha, úidiń ishi kók tútinge tolyp ketken. Esikti ashqan sátte tútin syrtqa shyǵyp, sol kezde ǵana tiri qalǵan bala esikke eńbektep jetip, esinen tanyp qala jazdaǵan. Jedel járdem ony birden aýrýhanaǵa alyp ketken.
Jergilikti turǵyndar marqum áieldiń birneshe jyl buryn joldasynan ajyrasyp, osy aýylǵa kóship kelgenin aitady. Ol osy úidi jaldap turyp, balabaqshada tárbieshi bolyp jumys istegen. Kórshileriniń sózinshe, peshtiń aqaýly ekeni birneshe ret úi iesine eskertilgen, biraq tiisti shara qabyldanbaǵan.
Qaiǵyly oqiǵadan bir ǵana bala aman qaldy, ol marqumnyń jetinshi synypta oqityn uly. Qazir onyń jaǵdaiy jaqsy, endi ony ákesi alyp ketpek.
Oblystyq tótenshe jaǵdailar departamentiniń habarlaýynsha, oqiǵaǵa úi murjasynyń tazalanbaýy sebep bolýy múmkin. Qazir tergeý júrgizilip jatyr.
