جەلتوقسان ايىندا قازاقستاندا تۇرعىن ءۇيدى ساتىپ الۋ-ساتۋ بويىنشا سوڭعى ءۇش جىلداعى ەڭ جوعارى كورسەتكىش تىركەلدى، دەپ حابارلايدى Dalanews.kz.
رەسمي ستاتيستيكاعا سايكەس، 2025 جىلدىڭ جەلتوقسانىندا ەل بويىنشا 53 128 مامىلە جاسالعان. بۇل ءبىر ايداعى كورسەتكىشتىڭ 32،9 پايىزعا وسكەنىن بىلدىرەدى.
قاراشا ايىمەن سالىستىرعاندا بارلىق وڭىردە ءوسىم بايقالدى. ەڭ جوعارى ديناميكا ماڭعىستاۋ وبلىسىندا (+69،2%)، پاۆلودار وبلىسىندا (+66،3%) جانە اقتوبە وبلىسىندا (+53،6%) تىركەلدى.
مامىلە سانى بويىنشا كوشباسشىلار – استانا (11 674 مامىلە نەمەسە 22%)، الماتى (9 013 نەمەسە 17%) جانە قاراعاندى وبلىسى (3 804 نەمەسە 7،2%). ەڭ تومەن كورسەتكىش ۇلىتاۋ وبلىسىندا – 427 مامىلە (0،8%).
پاتەرلەر نارىعىندا كەلىسىمدەر سانى 31،9 پايىزعا ءوسىپ، 41 177-گە جەتتى. بۇل بارلىق مامىلەنىڭ 77،5 پايىزى. نەگىزگى ۇلەس استاناعا (28%)، الماتىعا (20%) جانە قاراعاندى وبلىسىنا (7،8%) تيەسىلى. ەڭ كوپ سۇرانىسقا يە تۇرعىن ءۇي ءتۇرى – ءبىر بولمەلى پاتەرلەر: جەلتوقساندا 15 323 مامىلە راسىمدەلگەن.
جەكە ۇيلەر بويىنشا مامىلەلەر سانى 36،6 پايىزعا ارتىپ، 11 951-گە جەتتى. بارلىق وڭىردە ءوسىم بايقالدى، تەك پاۆلودار وبلىسىندا كورسەتكىش 10،4 پايىزعا تومەندەگەن. ەڭ جوعارى ءوسىم ماڭعىستاۋ (+83،9%)، اقتوبە (+76،6%) جانە باتىس قازاقستان (+52،8%) وبلىستارىندا تىركەلدى.
جىلدىق ەسەپتە جەلتوقسانداعى مامىلەلەر سانى 2024 جىلدىڭ وسى كەزەڭىمەن سالىستىرعاندا 6،2 پايىزعا ارتقان. ەڭ جوعارى ءوسىم جەتىسۋ وبلىسىندا (+35،8%)، ال ەڭ ۇلكەن تومەندەۋ ۇلىتاۋ وبلىسىندا (–33،8%) بايقالدى.
جالپى 2025 جىلى ەل بويىنشا 448 571 تۇرعىن ءۇي مامىلەسى جاسالدى. بۇل 2024 جىلمەن سالىستىرعاندا 3،6 پايىزعا كوپ. ەڭ جوعارى ءوسىم استانادا (+21،6%)، جامبىل وبلىسىندا (+10،1%) جانە جەتىسۋ وبلىسىندا (+10،1%) تىركەلسە، ەڭ ۇلكەن قۇلدىراۋ اتىراۋ وبلىسىندا (–13،2%)، ۇلىتاۋ (–12،5%) جانە باتىس قازاقستان وبلىستارىندا (–12،3%) بايقالدى.
