Jeltoqsan aıynda Qazaqstanda turǵyn úıdi satyp alý-satý boıynsha sońǵy úsh jyldaǵy eń joǵary kórsetkish tirkeldi, dep habarlaıdy Dalanews.kz.
Resmı statısıkaǵa sáıkes, 2025 jyldyń jeltoqsanynda el boıynsha 53 128 mámile jasalǵan. Bul bir aıdaǵy kórsetkishtiń 32,9 paıyzǵa óskenin bildiredi.
Qarasha aıymen salystyrǵanda barlyq óńirde ósim baıqaldy. Eń joǵary dınamıka Mańǵystaý oblysynda (+69,2%), Pavlodar oblysynda (+66,3%) jáne Aqtóbe oblysynda (+53,6%) tirkeldi.
Mámile sany boıynsha kóshbasshylar – Astana (11 674 mámile nemese 22%), Almaty (9 013 nemese 17%) jáne Qaraǵandy oblysy (3 804 nemese 7,2%). Eń tómen kórsetkish Ulytaý oblysynda – 427 mámile (0,8%).
Páterler naryǵynda kelisimder sany 31,9 paıyzǵa ósip, 41 177-ge jetti. Bul barlyq mámileniń 77,5 paıyzy. Negizgi úles Astanaǵa (28%), Almatyǵa (20%) jáne Qaraǵandy oblysyna (7,8%) tıesili. Eń kóp suranysqa ıe turǵyn úı túri – bir bólmeli páterler: jeltoqsanda 15 323 mámile rásimdelgen.
Jeke úıler boıynsha mámileler sany 36,6 paıyzǵa artyp, 11 951-ge jetti. Barlyq óńirde ósim baıqaldy, tek Pavlodar oblysynda kórsetkish 10,4 paıyzǵa tómendegen. Eń joǵary ósim Mańǵystaý (+83,9%), Aqtóbe (+76,6%) jáne Batys Qazaqstan (+52,8%) oblystarynda tirkeldi.
Jyldyq esepte jeltoqsandaǵy mámileler sany 2024 jyldyń osy kezeńimen salystyrǵanda 6,2 paıyzǵa artqan. Eń joǵary ósim Jetisý oblysynda (+35,8%), al eń úlken tómendeý Ulytaý oblysynda (–33,8%) baıqaldy.
Jalpy 2025 jyly el boıynsha 448 571 turǵyn úı mámilesi jasaldy. Bul 2024 jylmen salystyrǵanda 3,6 paıyzǵa kóp. Eń joǵary ósim Astanada (+21,6%), Jambyl oblysynda (+10,1%) jáne Jetisý oblysynda (+10,1%) tirkelse, eń úlken quldyraý Atyraý oblysynda (–13,2%), Ulytaý (–12,5%) jáne Batys Qazaqstan oblystarynda (–12,3%) baıqaldy.
