قازاقستاننىڭ سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگىنە قاراستى جاساندى ينتەللەكت جانە يننوۆاسيالاردى دامىتۋ كوميتەتى ءتوراعاسىنىڭ ورىنباسارى الىبەك سايلانبايەۆ مەديسينا سالاسىندا جاساندى ينتەللەكتى قولدانۋ كەزىندە تۋىنداۋى مۇمكىن قاتەلىكتەرگە كىم جاۋاپ بەرەتىنىن ايتتى، دەپ حابارلايدى Dalanews.kz.
ونىڭ سوزىنشە، مەديسينا – جاساندى ينتەللەكت العاش ەنگىزىلە باستاعان سالالاردىڭ ءبىرى. ءقازىر ەلىمىزدە جاساندى ينتەللەكت نەگىزىندە جۇمىس ىستەيتىن بىرنەشە ستارتاپ ىسكە قوسىلعان. ماسەلەن، اقىلدى تەحنولوگيالار ءينسۋلتتى مي سۋرەتتەرى ارقىلى انىقتاۋعا، اۋىز قۋىسى اۋرۋلارىن 3D كەسكىندەر ارقىلى دياگنوستيكالاۋعا كومەكتەسەدى.
"قازىرگى تاڭدا جاساندى ينتەللەكت – بۇل تەك قۇرال. ول دارىگەرگە كەيبىر نارسەلەردى انىقتاۋعا كومەكتەسەدى. ماسەلەن، دارىگەر بايقاماعان جايتتاردى ءىى تەز انىقتاپ بەرە الادى. ءبىراق وعان تولىق سەنىپ، ەمدەۋدى تولىعىمەن سوعان جۇكتەۋ ءالى ەرتە دەپ ويلايمىن"، – دەدى سايلانبايەۆ ورتالىق كوممۋنيكاسيالار قىزمەتىندە وتكەن بريفينگتە.
دەگەنمەن سپيكەردىڭ پىكىرىنشە، دياگنوز قويۋ كەزىندە جاساندى ينتەللەكتتىڭ قاتەسى ورىن السا، تۇپكىلىكتى جاۋاپكەرشىلىك دارىگەرگە جۇكتەلۋى ءتيىس.
"مىسالى، ءسىز بىرەۋگە تاياق لاقتىردىڭىز دەلىك. بۇل جاعدايدا كىنا تاياقتا ەمەس، سىزدە. ياعني جاساندى ينتەللەكت – دارىگەرگە كومەكتەسەتىن قۇرال عانا. ال دياگنوز قويىپ، ەم جۇرگىزەتىن دارىگەردىڭ ءوزى. سوندىقتان جاۋاپكەرشىلىك تە سوعان تيەسىلى"، – دەپ ءتۇسىندىردى سايلانبايەۆ.
