قازاقستاندا ءبىلىم بەرۋ سالاسىندا تەحنولوگياعا نەگىزدەلگەن جاڭا مودەل قالىپتاسىپ جاتىر. بۇل تۋرالى Bilim Group نەگىزىن قالاۋشى، "قازاق ءتىلى" حالىقارالىق قوعامىنىڭ پرەزيدەنتى راۋان كەنجەحان ۇلى ايتىپ، ەلدەگى سيفرلىق ترانسفورماسيانىڭ اۋقىمىنا توقتالدى، دەپ حابارلايدى Dalanews.kz
ونىڭ سوزىنشە، جوبا باستاپقىدا جاي عانا ترەنينگ فورماتى ەمەس، ۇلتتىق دەڭگەيدەگى ءبىلىم بەرۋ باستاماسى رەتىندە قاراستىرىلعان. نەگىزگى گيپوتەزا – تەحنولوگيالىق ەكوجۇيەمەن كوللابوراسيا قۇرۋ ارقىلى وقۋشىلاردىڭ موتيۆاسياسىن كۇشەيتىپ، ناتيجەسىن ارتتىرۋ.
«ءبىز ۇلكەن گيپوتەزامەن Freedom-عا باردىق. Freedom شىنىمەن يننوۆاسيالىق ەكوجۇيە رەتىندە باستامامىزدى قولدادى. ءقازىر SuperApp ىشىندە ءبىزدىڭ شەشىمدەر جۇمىس ىستەپ تۇر. ولار وقۋشىلاردى، اتا-انالاردى جانە مۇعالىمدەردى مۇلدە جاڭا تاسىلدەرمەن ىنتالاندىرىپ، وقۋ پروسەسىندە قولداپ وتىر»، – دەدى راۋان كەنجەحان ۇلى.
ونىڭ ايتۋىنشا، مۇنداي دەڭگەيدەگى كوللابوراسيا وڭىردە بۇرىن-سوڭدى بولماعان. قازاقستان قىسقا ۋاقىت ىشىندە مەكتەپ جۇيەسىن تولىق سيفرلاندىرعان ەلدەردىڭ بىرىنە اينالدى.
بۇگىندە مەكتەپ باعدارلاماسىنىڭ بارلىعى سيفرلىق فورماتتا قولجەتىمدى. اتاپ ايتقاندا:
– 39 ءپان،
– 11 وقۋ دەڭگەيى،
– 13 300 تاقىرىپ تولىق جۇيەلەنگەن.
بۇل – ءبىرىنشى سىنىپتان باستاپ مەكتەپ بىتىرۋگە دەيىن ءار وقۋشى مەڭگەرۋى ءتيىس ءبىلىم بىرلىكتەرىنىڭ ناقتى سانى. ياعني، 13 300 تاقىرىپ – بالانىڭ مەكتەپ قابىرعاسىندا يگەرۋى ءتيىس داعدىلار مەن ءبىلىم كولەمىنىڭ سيفرلىق كارتاسى.
راۋان كەنجەحان ۇلىنىڭ پىكىرىنشە، قازىرگى ءبىلىم ساپاسىن باعالاۋ ءتاسىلى وزگەرۋى ءتيىس.
«ماسەلە باعدارلامانى تولىق ءوتۋ ەمەس. ناقتى سۇراق – بالا وسى 13 300 تاقىرىپتىڭ قانشاسىن شىن مانىندە مەڭگەردى؟ ولار اراسىندا بايلانىس ورناتا الدى ما؟ سول ءبىلىم ارقىلى قورشاعان ورتا تۋرالى تۇسىنىك قالىپتاستىردى ما؟» – دەدى ول.
بارلىق تاقىرىپ بىرنەشە فورماتتا ۇسىنىلعان: انيماسيا، بەينەساباق، ينتەراكتيۆتى سيمۋلياتورلار، جاتتىعۋ ترەناجەرلارى. كونتەنت ءۇش تىلدە قولجەتىمدى. مۇعالىمدەر ونى سىنىپتا ەكرانعا شىعارىپ پايدالانا الادى، ال وقۋشىلار ۇيدە دايىندالىپ، تاپسىرمالاردى اۆتوماتتاندىرىلعان جۇيە ارقىلى ورىنداي الادى.
جوبا اۆتورلارىنىڭ ايتۋىنشا، بۇل جۇيە تەك سيفرلىق كىتاپحانا ەمەس، تۇتاس ءبىلىم بەرۋ ەكوجۇيەسى. ول وقۋشىنىڭ ۇلگەرىمىن تالداپ، ءالسىز تۇستارىن انىقتاۋعا مۇمكىندىك بەرەدى.
جاساندى ينتەللەكتتىڭ ەنگىزىلۋى بۇل پروسەستى جاڭا دەڭگەيگە شىعارعان. AI تەحنولوگيالارى وقۋشىنىڭ وقۋ قارقىنىن سارالاپ، جەكە ۇسىنىستار بەرەدى، ماتەريالدى مەڭگەرۋ دەڭگەيىن ناقتى كورسەتەدى جانە وقۋ تراەكتورياسىن بەيىمدەيدى.
«جي كەلگەننەن كەيىن پروسەسس الدەقايدا كرەاتيۆتى جانە يكەمدى بولا ءتۇستى. ءبىز ءبىلىمدى جەكەلەندىرۋدىڭ ناقتى كەزەڭىنە وتتىك»، – دەدى راۋان كەنجەحان ۇلى.
وسىلايشا، قازاقستاندا ءبىلىم بەرۋ جۇيەسى جاي عانا سيفرلاندىرىلىپ جاتقان جوق. ول دەرەكتەرگە نەگىزدەلگەن، جەكەلەندىرىلگەن جانە تەحنولوگيامەن ينتەگراسيالانعان جاڭا مودەلگە كوشىپ جاتىر. Freedom-پەن سەرىكتەستىك وسى ترانسفورماسيانىڭ ماڭىزدى ەلەمەنتتەرىنىڭ ءبىرى سانالادى.
