ءۇندىستاندا مەديسينالىق ۇشاق اپاتقا ۇشىرادى، دەپ حابارلايدى Dalanews.kz.
قايعىلى وقيعا 23 اقپاندا دجاركحاند شتاتىندا بولدى. ءۇندىستان اۋماعىندا Beechcraft C90 مەديسينالىق ۇشاعى اۋەگە كوتەرىلگەننەن كەيىن بىرنەشە مينۋت وتكەن سوڭ قالىڭ ورمانعا قۇلاعان.
ۇشاق بورتىنداعى بارلىق ادام قازا تاپتى. ولاردىڭ قاتارىندا اۋىر كۇيىك العان ناۋقاس، ونىڭ ەكى تۋىسى، دارىگەر، فەلدشەر جانە ەكى ۇشقىش بولعان.
الدىن الا مالىمەتكە سايكەس، اپاتقا قولايسىز اۋا رايى مەن قاتتى تۋربۋلەنتتىلىك سەبەپ بولعان. سونىڭ سالدارىنان ۇشقىشتار اۋە كەمەسىن باسقارا الماي قالعان.
كۋاگەرلەردىڭ ايتۋىنشا، ۇشاق قۇلاعان ساتتە قاتتى جارىلىس ەستىلىپ، ورمان ۇستىنەن قالىڭ ءتۇتىن كوتەرىلگەن.
قازىرگى ۋاقىتتا وقيعا ورنىندا اۋە اپاتتارىن تەرگەۋ بيۋروسى كوميسسياسى جۇمىس ىستەپ جاتىر. تەرگەۋ جالعاسۋدا.
