قازاقستاننىڭ ەكى بىردەي وڭىرىندە پويىز بەن جەڭىل كولىك سوقتىعىسا جازدادى. ەكى وقيعا بويىنشا دا تەرگەۋ جۇرگىزىلىپ جاتىر، دەپ حابارلايدى Dalanews.kz.
"قازاقستان تەمىر جولى" ۇك" اق باسپا ءسوز قىزمەتى مالىمەتىنشە، ءبىرىنشى وقيعا 23 اقپاندا ساعات 06:26-دا تاراز-شۋ ۋچاسكەسىندە بولعان.
ءاقشولاق-ۇشبۇلاق ارالىعىنداعى تەمىرجول وتكەلىندە ەلەكتروۆوز ءماشينيسى Chevrolet Cobalt كولىگىنە سوقتىعىسپاس ءۇشىن پويىزدى شۇعىل تەجەگەن. سالدارىنان پويىز 22 مينۋتقا كەشىككەن. بۇل اقپارات تاراز قالاسىنىڭ جول پوليسياسىنا جىبەرىلگەن.
"ەكىنشى جاعداي دا 23 اقپاندا ساعات 15:35-تە ارىس-تۇلكىباس ۋچاسكەسىندە بولعان. شىمكەنت-قىزىلساي ارالىعىندا ساعاتىنا 51 شاقىرىم جىلدامدىقپەن كەلە جاتقان №2230 پويىز ءماشينيسى جەڭىل كولىك جولعا شىعۋىنا بايلانىستى پويىزدى شۇعىل تەجەگەن. كولىك جۇرگىزۋشىسى وقيعا ورنىنان قاشىپ كەتكەن. پويىز 16 مينۋتقا كەشىككەن"، - دەپ جازىلعان "قتج" حابارلاماسىندا.
