جىل سايىن الەمدە ميلليوننان استام ادامعا قاتەرلى ىسىك دياگنوزى قويىلادى. قازاقستاندا 2025 جىلعى دەرەك بويىنشا 249 مىڭنان استام ناۋقاس تىركەۋدە تۇر. ونىڭ ىشىندە 40 مىڭنان استام ادامعا دياگنوز بيىل انىقتالعان. بۇل مالىمەت ب ا ق وكىلدەرىنە ارنالعان مەديسينالىق تەكسەرۋ كەزىندە جاريا ەتىلدى، دەپ حابارلايدى Dalanews.kz
قازاقستاندا ونكولوگيالىق اۋرۋلاردى ەرتە انىقتاۋعا ەرەكشە كوڭىل بولىنۋدە. بۇل باعىتتاعى جۇمىستار ق ر ۇكىمەتى بەكىتكەن 2023–2027 جىلدارعا ارنالعان كەشەندى جوسپار اياسىندا جۇزەگە اسىرىلىپ جاتىر. اتالعان باعدارلاماعا سايكەس، ازاماتتار ءسۇت بەزى، جاتىر موينى جانە توقىشەك قاتەرلى ىسىگىنە تەگىن سكرينينگتەن وتە الادى. بۇل قىزمەت مىندەتتى الەۋمەتتىك مەديسينالىق ساقتاندىرۋ مارتەبەسىنە قاراماستان ۇسىنىلادى.
الماتى ايماقتىق كوپسالالى كلينيكا ديرەكتورىنىڭ ورىنباسارى يگور نوۆيكوۆتىڭ ايتۋىنشا، زاماناۋي ونكولوگيا قارقىندى دامىپ كەلەدى. قازىرگى تاڭدا مولەكۋليارلىق-گەنەتيكالىق دياگنوستيكا، جەكە تەراپيا، يممۋندىق جانە تارگەتتىك ەمدەۋ تاسىلدەرى ەنگىزىلۋدە. بۇل ناۋقاستاردىڭ ءومىر ءسۇرۋ ۇزاقتىعىن ارتتىرىپ، ساپاسىن جاقسارتۋعا مۇمكىندىك بەرەدى. دەگەنمەن، اۋرۋدى ەرتە انىقتاۋ – ەمنىڭ ەڭ ءتيىمدى جولى بولىپ قالا بەرەدى.
الماتى وبلىسىندا بۇگىندە 12 283 ادام ونكولوگيالىق ەسەپتە تۇر. سكرينينگتىك تەكسەرۋلەر ناتيجەسىندە 77 مىڭنان استام ادام ءسۇت بەزى وبىرىنا، 12 مىڭنان استامى جاتىر موينى وبىرىنا، ال 91 مىڭنان استامى توقىشەك وبىرىنا تەكسەرىلگەن.
تەكسەرۋ ناتيجەسىندە ءسۇت بەزى بويىنشا 12 مىڭنان استام ايەلدە، جاتىر موينى بويىنشا 1799 ايەلدە، توقىشەك بويىنشا 247 ادامدا ىسىك الدى پاتولوگيا انىقتالعان. سونىمەن قاتار، اۋرۋدىڭ 0–1 كەزەڭىندە تۇرعان 170 ناۋقاس تىركەۋگە الىنعان. بۇل – دەر كەزىندە انىقتالعان دەرتتىڭ ەمدەلۋگە جوعارى مۇمكىندىك بەرەتىنىن كورسەتەدى.
سوعان قاراماستان، كوپشىلىك تەگىن تەكسەرۋ مۇمكىندىگىن تولىق پايدالانباي وتىر. كەيبىرى بۇل قىزمەت تۋرالى بىلمەسە، ەندى ءبىرى دياگنوزدان قورقىپ، دارىگەرگە قارالۋدى كەيىنگە قالدىرادى. ناتيجەسىندە اۋرۋ اسقىنىپ كەتۋى مۇمكىن.
اۋرۋدىڭ الدىن الۋ ماقساتىندا وڭىردە ءموبيلدى مەديسينالىق كەشەندەر دە جۇمىس ىستەيدى. سونىڭ ارقاسىندا شالعاي اۋىلداردا تۇراتىن تۇرعىندار دا تەكسەرۋدەن وتە الادى. ماسەلەن، 2025 جىلى 55 كوشپەلى تەكسەرۋ ۇيىمداستىرىلىپ، 13 مىڭنان استام ادام قامتىلدى. ناتيجەسىندە 32 ادامنان قاتەرلى ىسىك انىقتالىپ، 290 ادامدا ىسىك الدى جاعداي تىركەلدى.
سونىمەن قاتار، الماتى ايماقتىق كوپسالالى كلينيكاسىندا تۇراقتى تۇردە «اشىق ەسىك كۇندەرى» وتكىزىلەدى. بىلتىر مۇنداي شارا 13 رەت ۇيىمداستىرىلىپ، 500 ادام تەكسەرۋدەن وتكەن. ونىڭ ىشىندە 12 ادامنان قاتەرلى ىسىك انىقتالسا، 250 ادامدا كۇماندى وزگەرىستەر تابىلعان.
مامانداردىڭ ايتۋىنشا، قاتەرلى ىسىك بۇگىندە تەك مەديسينالىق ەمەس، الەۋمەتتىك-ەكونوميكالىق ماسەلەگە اينالىپ وتىر. اسىرەسە، ەر ازاماتتار اراسىندا ءولىم-جىتىم جوعارى. سەبەبى ايەلدەر دەنساۋلىعىنا جاۋاپكەرشىلىكپەن قارايدى.
دارىگەرلەردىڭ باستى كەڭەسى – ۋاقىتىلى تەكسەرۋدەن ءوتىپ، دەنساۋلىققا سالعىرت قاراماۋ. ويتكەنى ەرتە انىقتالعان اۋرۋدى تولىق ەمدەۋگە مۇمكىندىك الدەقايدا جوعارى.
