شىمكەنتتەگى مەتاللۋرگ پاركىندە تۇرعىندار مەن پوليسيا اراسىندا تۇسىنىسپەۋشىلىك تۋىندادى. پوليسەيلەر قاريالارعا جاتتىعۋمەن اينالىسۋعا رۇقسات بەرمەي قويعان، دەپ حابارلايدى Dalanews.kz.
پارككە كۇن سايىن تاڭەرتەڭ زەينەت جاسىنداعى ازاماتتار مەن وزگە دە تۇرعىندار جينالىپ، جاپپاي تاڭعى جاتتىعۋ جاسايدى. جاتتىعۋ بارىسىندا ىرعاق ءۇشىن شاعىن كولونكادان مۋزىكا قوسىلادى.
الايدا تۇرعىنداردىڭ ايتۋىنشا، 22 اقپاندا تاڭعى ساعات 07:00 شاماسىندا پارككە ەكى پاترۋلدىك پوليسيا قىزمەتكەرى كەلىپ، مۋزىكانى ءوشىرۋدى تالاپ ەتكەن. پوليسەيلەر كورشىلەس ۇيلەردىڭ تۇرعىندارىنان شاعىم تۇسكەنىن ايتقان.
تاڭعى جاتتىعۋعا قاتىسۋشىلار بۇل تالاپتى تۇسىنىكسىز دەپ سانايدى. ولاردىڭ سوزىنشە، پارككە ەڭ جاقىن تۇرعىن ءۇي كەمىندە 500 مەتر قاشىقتىقتا ورنالاسقان، ال مۋزىكا پارك اۋماعىندا ارەڭ ەستىلەتىن دەڭگەيدە قوسىلعان.
«جانىمىزدا BI Group كومپانياسى تۇرعىن ءۇي كەشەنىن سالىپ جاتىر. جاز بويى كراندار مەن اۋىر تەحنيكا ءتۇننىڭ ءبىر ۋاعىنا دەيىن جۇمىس ىستەدى. وعان تالاي رەت شاعىمداندىق، ءبىراق ەش ناتيجە بولمادى. ال ەندى تاڭعى جاتتىعۋداعى باسەڭ مۋزىكاعا بولا پوليسيا كەلۋى – اقىلعا قونىمسىز»، – دەيدى تۇرعىندار.
پوليسيا اتالعان جاعدايعا قاتىستى رەسمي تۇسىنىكتەمە بەردى. ۆەدومستۆو مالىمەتىنشە، تاڭعى ساعات 07:00 شاماسىندا پوليسياعا تۇرعىن ءۇي تۇرعىندارىنان كوشەدە قاتتى مۋزىكا قويىلىپ، ازاماتتاردىڭ تىنىشتىعى بۇزىلىپ جاتقانى جونىندە قوڭىراۋ تۇسكەن.
وسى حابارلاماعا سايكەس، پاترۋلدىك پوليسيا قىزمەتكەرلەرى كورسەتىلگەن مەكەنجايعا جەدەل جەتكەن. پوليسيا وكىلدەرى مۇنداي شاقىرتۋلارعا ارەكەت ەتۋ ولاردىڭ تىكەلەي مىندەتىنە كىرەتىنىن اتاپ ءوتتى.
وقيعا ورنىندا پوليسەيلەر ءتۇسىندىرۋ جۇمىستارىن جۇرگىزىپ، دەمالىس كۇندەرى تىنىشتىقتى ساقتاۋ تالاپتارىن جانە تاڭعى ۋاقىتتا مۋزىكانى قاتتى قويۋعا جول بەرىلمەيتىنىن ەسكەرتكەن. اڭگىمەدەن كەيىن پاترۋل قىزمەتكەرلەرى قىزمەتىن جالعاستىرعان.
سونىمەن قاتار پوليسيا قوعامدىق ءتارتىپ نورمالارىن ساقتاۋعا جانە اينالاداعى ادامداردىڭ تىنىشتىعىنا قۇرمەتپەن قاراۋعا شاقىردى. ۆەدومستۆو وكىلدەرى قوعامدىق ورىنداردا مۋزىكا تىڭداۋعا تىيىم سالىنبايتىنىن، الايدا ونىڭ دىبىس دەڭگەيى ەشكىمگە كەدەرگى كەلتىرمەۋى جانە تۇرعىنداردان شاعىم تۇسپەۋى ءتيىس ەكەنىن دە اتاپ ءوتتى.
