Shymkenttegi Metallýrg parkinde turǵyndar men politsiia arasynda túsinispeýshilik týyndady. Politseiler qariialarǵa jattyǵýmen ainalysýǵa ruqsat bermei qoiǵan, dep habarlaidy Dalanews.kz.
Parkke kún saiyn tańerteń zeinet jasyndaǵy azamattar men ózge de turǵyndar jinalyp, jappai tańǵy jattyǵý jasaidy. Jattyǵý barysynda yrǵaq úshin shaǵyn kolonkadan mýzyka qosylady.
Alaida turǵyndardyń aitýynsha, 22 aqpanda tańǵy saǵat 07:00 shamasynda parkke eki patrýldik politsiia qyzmetkeri kelip, mýzykany óshirýdi talap etken. Politseiler kórshiles úilerdiń turǵyndarynan shaǵym túskenin aitqan.
Tańǵy jattyǵýǵa qatysýshylar bul talapty túsiniksiz dep sanaidy. Olardyń sózinshe, parkke eń jaqyn turǵyn úi keminde 500 metr qashyqtyqta ornalasqan, al mýzyka park aýmaǵynda áreń estiletin deńgeide qosylǵan.
«Janymyzda BI Group kompaniiasy turǵyn úi keshenin salyp jatyr. Jaz boiy krandar men aýyr tehnika túnniń bir ýaǵyna deiin jumys istedi. Oǵan talai ret shaǵymdandyq, biraq esh nátije bolmady. Al endi tańǵy jattyǵýdaǵy báseń mýzykaǵa bola politsiia kelýi – aqylǵa qonymsyz», – deidi turǵyndar.
Politsiia atalǵan jaǵdaiǵa qatysty resmi túsinikteme berdi. Vedomstvo málimetinshe, tańǵy saǵat 07:00 shamasynda politsiiaǵa turǵyn úi turǵyndarynan kóshede qatty mýzyka qoiylyp, azamattardyń tynyshtyǵy buzylyp jatqany jóninde qońyraý túsken.
Osy habarlamaǵa sáikes, patrýldik politsiia qyzmetkerleri kórsetilgen mekenjaiǵa jedel jetken. Politsiia ókilderi mundai shaqyrtýlarǵa áreket etý olardyń tikelei mindetine kiretinin atap ótti.
Oqiǵa ornynda politseiler túsindirý jumystaryn júrgizip, demalys kúnderi tynyshtyqty saqtaý talaptaryn jáne tańǵy ýaqytta mýzykany qatty qoiýǵa jol berilmeitinin eskertken. Áńgimeden keiin patrýl qyzmetkerleri qyzmetin jalǵastyrǵan.
Sonymen qatar politsiia qoǵamdyq tártip normalaryn saqtaýǵa jáne ainaladaǵy adamdardyń tynyshtyǵyna qurmetpen qaraýǵa shaqyrdy. Vedomstvo ókilderi qoǵamdyq oryndarda mýzyka tyńdaýǵa tyiym salynbaitynyn, alaida onyń dybys deńgeii eshkimge kedergi keltirmeýi jáne turǵyndardan shaǵym túspeýi tiis ekenin de atap ótti.
