ەلەۋمەتتٸك جەلٸلەردە «قازاقستاندىق جەر قىتاي ازاماتتارىنا ساتىلىپ جاتىر» دەگەن اقپارات قىزۋ تالقىلاندى. ەسٸرەسە الاتاۋ قالاسىنىڭ ماڭىنان 350 مىڭ دوللارعا جەر ساتىلادى دەگەن قىتاي تٸلٸندەگٸ جارناما جۇرتتىڭ الاڭداۋشىلىعىن كٷشەيتكەن, دەپ حابارلايدى Dala news.
بۇل مەسەلەگە قاتىستى جۋرناليست دياس نۇراقىن Facebook پاراقشاسىندا پٸكٸر بٸلدٸردٸ. ونىڭ جازۋىنشا, تاراعان حابارلامانىڭ ارتىندا قىتاي ازاماتى ەمەس, قىتاي تٸلٸن مەڭگەرگەن قازاقستاندىق ريەلتور تۇرعان.
«قىتايشا جەر ساتىلادى دەپ جٷرگەن ايدالاداعى بٸرەۋ ەمەس, ٶزٸمٸزدٸڭ قاراكٶز قازاق جٸگٸتٸ ەكەن. قىتايدا وقىپ كەلگەن, قىتايشا بٸلەتٸن ريەلتور بولىپ شىقتى», – دەپ جازدى ول.
جۋرناليستٸڭ مەلٸمەتٸنشە, سٶز الاتاۋ قالاسى ماڭىنداعى جەر تەلٸمدەرٸ تۋرالى بولىپ وتىر. قالا دامىپ, بولاشاقتا ٸرٸ, زاماناۋي ورتالىققا اينالادى دەگەن بولجام اياسىندا جەر باعاسى ٶسكەن. بۇرىن ارزانعا الىنعان تەلٸمدەردٸ كەيبٸر ازاماتتار ٶندٸرٸس, كەسٸپورىن نەمەسە ٶزگە بيزنەس نىساندارىن سالعىسى كەلەتٸندەرگە ۇسىنىپ جاتىر.
سونداي-اق ول جارناما قىتاي تٸلٸندە جارييالانعانىمەن, بۇل جەردٸڭ شەتەلدٸكتەرگە ساتىلىپ جاتقانىنىڭ دەلەلٸ ەمەس ەكەنٸن اتاپ ٶتتٸ. ونىڭ ايتۋىنشا, ريەلتور ەلەۋەتتٸ ينۆەستورلاردى تارتۋ ماقساتىندا جارنامانى شەتەلدٸك اۋديتوريياعا باعىتتاۋى مٷمكٸن.
دياس نۇراقىن الاتاۋ قالاسى قۇرىلعاننان بەرٸ مەملەكەت تاراپىنان قىتاي ازاماتتارى مەن كومپانييالارىنا جەر جاپپاي ساتىلدى دەگەن اقپارات شىندىققا جاناسپايتىنىن جەتكٸزدٸ. سونىمەن قاتار ول الاياقتىق ەرەكەتتەردەن ساق بولۋعا شاقىردى.
«تيك-توك پەن ينستاگرامداعى جارناماعا سەنٸپ جەر الماڭىزدار. “جەر ساتامىز” دەپ جالعان جارناما جاساپ جٷرگەن الاياقتار بار. كەز كەلگەن جەر تەلٸمٸن ساتىپ الماس بۇرىن قۇجاتتارىن تيٸستٸ مەكەمەلەردەن تەكسەرگەن دۇرىس», – دەپ ەسكەرتتٸ جۋرناليست.
ول سونداي-اق كونستيتۋتسييادا جەر مەن ونىڭ قويناۋى حالىققا تيەسٸلٸ ەكەنٸ جازىلعانىن ەسكە سالدى. سوندىقتان جەلٸدە تاراعان كەز كەلگەن اقپاراتقا ەموتسييامەن ەمەس, زاڭ اياسىندا ەرٸ رەسمي دەرەكتەرگە سٷيەنە وتىرىپ قاراۋ قاجەت ەكەنٸن اتاپ ٶتتٸ.
