Áleýmettik jelilerde «qazaqstandyq jer qytai azamattaryna satylyp jatyr» degen aqparat qyzý talqylandy. Ásirese Alataý qalasynyń mańynan 350 myń dollarǵa jer satylady degen qytai tilindegi jarnama jurttyń alańdaýshylyǵyn kúsheitken, dep habarlaidy Dala news.
Bul máselege qatysty jýrnalist Dias Nuraqyn Facebook paraqshasynda pikir bildirdi. Onyń jazýynsha, taraǵan habarlamanyń artynda qytai azamaty emes, qytai tilin meńgergen qazaqstandyq rieltor turǵan.
«Qytaisha jer satylady dep júrgen aidaladaǵy bireý emes, ózimizdiń qarakóz qazaq jigiti eken. Qytaida oqyp kelgen, qytaisha biletin rieltor bolyp shyqty», – dep jazdy ol.
Jýrnalistiń málimetinshe, sóz Alataý qalasy mańyndaǵy jer telimderi týraly bolyp otyr. Qala damyp, bolashaqta iri, zamanaýi ortalyqqa ainalady degen boljam aiasynda jer baǵasy ósken. Buryn arzanǵa alynǵan telimderdi keibir azamattar óndiris, kásiporyn nemese ózge biznes nysandaryn salǵysy keletinderge usynyp jatyr.
Sondai-aq ol jarnama qytai tilinde jariialanǵanymen, bul jerdiń sheteldikterge satylyp jatqanynyń dáleli emes ekenin atap ótti. Onyń aitýynsha, rieltor áleýetti investorlardy tartý maqsatynda jarnamany sheteldik aýditoriiaǵa baǵyttaýy múmkin.
Dias Nuraqyn Alataý qalasy qurylǵannan beri memleket tarapynan Qytai azamattary men kompaniialaryna jer jappai satyldy degen aqparat shyndyqqa janaspaitynyn jetkizdi. Sonymen qatar ol alaiaqtyq áreketterden saq bolýǵa shaqyrdy.
«Tik-tok pen instagramdaǵy jarnamaǵa senip jer almańyzdar. “Jer satamyz” dep jalǵan jarnama jasap júrgen alaiaqtar bar. Kez kelgen jer telimin satyp almas buryn qujattaryn tiisti mekemelerden teksergen durys», – dep eskertti jýrnalist.
Ol sondai-aq Konstitýtsiiada jer men onyń qoinaýy halyqqa tiesili ekeni jazylǵanyn eske saldy. Sondyqtan jelide taraǵan kez kelgen aqparatqa emotsiiamen emes, zań aiasynda ári resmi derekterge súiene otyryp qaraý qajet ekenin atap ótti.
