استانادا ق ر پرەمەر-مينيسترىنىڭ ورىنباسارى – مادەنيەت جانە اقپارات ءمينيسترى ايدا بالايەۆا توراعالىعىمەن ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ كەڭەيتىلگەن القا وتىرىسى ءوتتى، دەپ حابارلايدى Dala news.
جيىنعا ق ر ەڭبەك جانە حالىقتى الەۋمەتتىك قورعاۋ ءمينيسترى اسكاربەك ەرتايەۆ، پارلامەنت دەپۋتاتتارى، ورتالىق جانە جەرگىلىكتى مەملەكەتتىك ورگانداردىڭ، ۆەدومستۆوعا قاراستى ۇيىمداردىڭ وكىلدەرى مەن الەۋمەتتىك سەرىكتەستەر قاتىستى.
ايدا بالايەۆا ءوز سوزىندە پرەزيدەنت الەۋمەتتىك سالاعا ايرىقشا ءمان بەرەتىنىن اتاپ ءوتتى. ونىڭ ايتۋىنشا، ازاماتتاردىڭ ءال-اۋقاتى مەن ەلدىڭ ورنىقتى دامۋىن قامتاماسىز ەتۋ جاڭا كونستيتۋسيا جوباسىنىڭ نەگىزىنە اينالعان.
وتىرىستاعى نەگىزگى ماسەلەلەردىڭ ءبىرى – حالىقتى جۇمىسپەن قامتۋ. 2025 جىلدىڭ قورىتىندىسى بويىنشا ەلدە 2،9 ملن ساپالى جۇمىس ورنىنىڭ جۇمىس ىستەۋى قامتاماسىز ەتىلگەن. ال 2026 جىلى وڭىرلىك جۇمىسپەن قامتۋ كارتالارى اياسىندا 547،7 مىڭ ادامدى جۇمىسقا ورنالاستىرۋ جوسپارلانىپ وتىر.
كۇن تارتىبىندە ەڭبەك قاۋىپسىزدىگى مەن جۇمىس ورنىنداعى ادامنىڭ قورعالۋ ماسەلەسى دە كوتەرىلدى. «سيفرلاندىرۋ جاعدايىندا ىڭعايلى ءارى تۇسىنىكتى كوممۋنيكاسيا قۇرالدارىن ەنگىزۋ قاجەت»، – دەدى ايدا بالايەۆا. سونداي-اق ۆيسە-پرەمەر تاراپتارعا بازالىق كەپىلدىكتەردى، قۇقىقتار مەن مىندەتتەردى بەكىتەتىن ۇلگىلىك ەڭبەك شارتىن ازىرلەۋدى تاپسىردى.
ۆەدومستۆو الدىنداعى ماڭىزدى مىندەتتەردىڭ قاتارىندا مۇگەدەكتىگى بار ازاماتتاردى كەشەندى الەۋمەتتىك قورعاۋ ماسەلەسى بار. ولاردى جۇمىسپەن قامتۋ تاسىلدەرىن قايتا قاراۋ، تەحنيكالىق وڭالتۋ قۇرالدارىمەن قامتاماسىز ەتۋ جانە ينفراقۇرىلىم نىساندارىنىڭ قولجەتىمدىلىگىن ارتتىرۋ قاجەتتىگى ايتىلدى. سونىمەن بىرگە مۇگەدەكتىگى بار بالالاردى دامىتۋ جانە الەۋمەتتەندىرۋ ماسەلەسىنە دە ەرەكشە نازار اۋدارىلدى.
مۇگەدەكتىك تاعايىنداۋ ءراسىمىنىڭ اشىقتىعىن قامتاماسىز ەتۋ ءۇشىن دەنساۋلىق ساقتاۋ مينيسترلىگى مەن ەحاقم جۇيەلەرىن ينتەگراسيالاۋ تاپسىرىلدى. جالپى، مەملەكەت باسشىسى جاريالاعان سيفرلاندىرۋ جانە جاساندى ينتەللەكت جىلى اياسىندا الەۋمەتتىك-ەڭبەك سالاسىن تەحنولوگيالىق تۇرعىدا جاڭعىرتۋ بويىنشا اۋقىمدى مىندەتتەر جۇكتەلگەنى اتاپ ءوتىلدى.
جيىندا بايانداما جاساعان اسكاربەك ەرتايەۆ ۆەدومستۆونىڭ اتقارعان جۇمىستارىنىڭ قورىتىندىسىن شىعارىپ، الداعى كەزەڭگە ارنالعان باسىم باعىتتاردى بەلگىلەدى.
