Astanada QR Premer-Ministriniń orynbasary – Mádeniet jáne aqparat ministri Aida Balaeva tóraǵalyǵymen QR Eńbek jáne halyqty áleýmettik qorǵaý ministrliginiń keńeitilgen alqa otyrysy ótti, dep habarlaidy Dala news.
Jiynǵa QR Eńbek jáne halyqty áleýmettik qorǵaý ministri Askarbek Ertaev, Parlament depýtattary, ortalyq jáne jergilikti memlekettik organdardyń, vedomstvoǵa qarasty uiymdardyń ókilderi men áleýmettik seriktester qatysty.
Aida Balaeva óz sózinde Prezident áleýmettik salaǵa airyqsha mán beretinin atap ótti. Onyń aitýynsha, azamattardyń ál-aýqaty men eldiń ornyqty damýyn qamtamasyz etý jańa Konstitýtsiia jobasynyń negizine ainalǵan.
Otyrystaǵy negizgi máselelerdiń biri – halyqty jumyspen qamtý. 2025 jyldyń qorytyndysy boiynsha elde 2,9 mln sapaly jumys ornynyń jumys isteýi qamtamasyz etilgen. Al 2026 jyly óńirlik jumyspen qamtý kartalary aiasynda 547,7 myń adamdy jumysqa ornalastyrý josparlanyp otyr.
Kún tártibinde eńbek qaýipsizdigi men jumys ornyndaǵy adamnyń qorǵalý máselesi de kóterildi. «Tsifrlandyrý jaǵdaiynda yńǵaily ári túsinikti kommýnikatsiia quraldaryn engizý qajet», – dedi Aida Balaeva. Sondai-aq vitse-premer taraptarǵa bazalyq kepildikterdi, quqyqtar men mindetterdi bekitetin úlgilik eńbek shartyn ázirleýdi tapsyrdy.
Vedomstvo aldyndaǵy mańyzdy mindetterdiń qatarynda múgedektigi bar azamattardy keshendi áleýmettik qorǵaý máselesi bar. Olardy jumyspen qamtý tásilderin qaita qaraý, tehnikalyq ońaltý quraldarymen qamtamasyz etý jáne infraqurylym nysandarynyń qoljetimdiligin arttyrý qajettigi aityldy. Sonymen birge múgedektigi bar balalardy damytý jáne áleýmettendirý máselesine de erekshe nazar aýdaryldy.
Múgedektik taǵaiyndaý rásiminiń ashyqtyǵyn qamtamasyz etý úshin Densaýlyq saqtaý ministrligi men EHÁQM júielerin integratsiialaý tapsyryldy. Jalpy, Memleket basshysy jariialaǵan Tsifrlandyrý jáne jasandy intellekt jyly aiasynda áleýmettik-eńbek salasyn tehnologiialyq turǵyda jańǵyrtý boiynsha aýqymdy mindetter júktelgeni atap ótildi.
Jiynda baiandama jasaǵan Askarbek Ertaev vedomstvonyń atqarǵan jumystarynyń qorytyndysyn shyǵaryp, aldaǵy kezeńge arnalǵan basym baǵyttardy belgiledi.
